AQSh Kongresi Ortalyq Azııadaǵy lańkestikke qarsy kúresti talqylady
ASTANA. KAZINFORM - AQSh Kongresiniń Ońtústik jáne Ortalyq Azııa boıynsha kishi komıtetinde «Ońtústik jáne Ortalyq Azııadaǵy lańkestik qaýip-qater jaǵdaıyn baǵalaý men yntymaqtastyq múmkindikterin zerdeleý» taqyrybynda tyńdaý ótti, dep habarlaıdy Kazinform tilshisi.
Tyńdaýdyń ashylýynda komıtet tóraǵasy, Ókilder palatasynyń respýblıkashyly Bıll Heızeng aımaqqa ǵana emes, búkil álemge qaýip tóndiretin «Ál-Qaıda» (Qazaqstanda tyıym salynǵan uıym – red.), DAISh (Qazaqstanda tyıym salynǵan uıym – red.) jáne «Tehrık-e Talıban Pákistan» tobynyń kúshterin jınaqtaýyna alańdaýshylyq bildirdi.
AQSh Kongresi Ókilder palatasynyń demokrat múshesi Sıdnı Kamlager-Dav AQSh lańkester eń kóp shoǵyrlanǵan Ońtústik jáne Ortalyq Azııadaǵy lańkestikke qarsy kúreste mańyzdy seriktes bolýy kerektigin atap ótti.
Saıasatker DAISh-tiń 2024 jyly Reseı men Iranda lańkestik áreketter jasaıtynyn, olardyń josparlary aıaqsyz qalǵan Germanııa, Aýstrııa, Frantsııa jáne Túrkııa sııaqty Eýropa elderine degen umtylystaryn, sondaı-aq AQSh-qa tónýi múmkin qaýip-qaterlerdi cóz etti.
Jańa amerıkalyq qaýipsizdik ortalyǵynyń Úndi-Tynyq muhıty baǵdarlamasynyń dırektory Lıza Kertıs Ońtústik jáne Ortalyq Azııadaǵy lańkestik qaýpi kúrdeli jáne Amerıka Qurama Shtattarynyń qaýipsizdigine jáne onyń ulttyq qaýipsizdik múddelerine áser etýi múmkin qaýip-qaterlerdi baqylaý jáne ustaý úshin Amerıka Qurama Shtattarynyń nazaryn talap etetinin jetkizdi.
Sarapshy Vashıngtonǵa aımaqtaǵy árbir elmen lańkestikke qarsy kúreste yntymaqtastyq ornatý, sondaı-aq keletin qaýipterdi joıý úshin seriktestermen birlesip sharalar qabyldaý qajet ekenin aıtty.
Demokratııalyq kongressmen Djýlııa Djonson terrorızmmen kúres Amerıka Qurama Shtattary úshin basymdyq bolýy kerek dep esepteıdi.
Buǵan deıin AQSh meksıkalyq kartelderdi sheteldik lańkestik uıym dep tanyǵany habarlanǵan bolatyn.