AQSh Kongresi 900 mlrd dollarlyq qorǵanys saıasaty týraly zań jobasyn qabyldamaq

ASTANA. KAZINFORM - AQSh Ókilder palatasy osy aptada áskerı salaǵa shamamen 900 mıllıard dollar bóletin zań jobasyn qarastyrmaq, dep habarlaıdy The New York Times.

Zań jobasynyń eki palataly nusqasy Aq úıdiń jyl sońyna deıin suraǵanynan 8 mıllıard dollarǵa artyq qarajatty kózdeıdi.

Zań jobasyna mynalar kiredi:

- mınıstrliktiń qarý-jaraq satyp alý rásimderin qaıta qaraý, sondaı-aq áskerı salany ártúrli materıaldarmen, ónimdermen jáne qyzmettermen qamtamasyz etetin memlekettik jáne jekemenshik uıymdar jelisin nyǵaıtý;

- áskerı kúshterdiń barlyq salalary qyzmetshileriniń jalaqysyn 3,8%-ǵa arttyrý;

- áskerı qyzmetshiler men olardyń otbasylary úshin ekstrakorporaldy uryqtandyrý (EKO) boıynsha medıtsınalyq saqtandyrýdy keńeıtý;

- prezıdent Donald Tramp shyǵarǵan onnan astam atqarýshy buıryqtardy kodıfıkatsııalaý, sonyń ishinde Amerıka Qurama Shtattarynda áskerı drondar óndirisin jedeldetýge, eldiń áýe jáne zymyranǵa qarsy qorǵanys júıesin sheteldik shabýyldardy toqtatý úshin «Altyn kúmbezge» aınaldyrýǵa jáne ońtústik shekarany patrýldeýge áskerlerdi ornalastyrýǵa baǵyttalǵan buıryqtar;

- AQSh áskerı akademııalaryndaǵy áıelder sport baǵdarlamalaryna transgender áıelderdiń qatysýyna tyıym salýdy qosa alǵanda, Respýblıkalyq partııanyń áskerı qyzmettegi genderlik máselelerge qatysty erejeleri;

- Baıden dáýirindegi klımattyq saıasatty ózgertý, sonyń ishinde Qorǵanys mınıstrliginiń elektrlik jáne gıbrıdti kólikterdi paıdalanýyna shekteýler qoıý;

- Ulttyq qaýipsizdikti qoldaý úshin 2027 qarjy jylyna deıin Ýkraınaǵa jyl saıyn 400 mıllıon dollar kómek kórsetý;

- jasandy ıntellekt jáne áskerı tehnologııalar sııaqty salalarǵa amerıkalyq kapıtal aǵynyn toqtatý úshin Qytaıdaǵy belgili bir tehnologııalarǵa AQSh ınvestıtsııalaryna jańa shekteýler qoıý;

- Sırııaǵa qarsy AQSh sanktsııalaryn alyp tastaý;

- 1991 jáne 2002 jyldary berilgen áskerı kúsh qoldaný ruqsatyn alyp tastaý. Eki partııa da Irak pen Parsy shyǵanaǵy soǵystary kezinde berilgen ruqsattardy alyp tastaýdy qoldady, olardy eki saıası partııanyń prezıdentteri ondaǵan jyldar boıy sheteldegi áskerı operatsııalardy aqtaý úshin paıdalandy.

Aıta keteıik, AQSh pen Ýkraına soǵysty toqtatý týraly kezekti kelissóz ótkizdi.