AQSh Kongo DR quramasyna 2026 jylǵy álem chempıonatyna kirýge tyıym salýy múmkin
ASTANA. KAZINFORM – Kongo Demokratııalyq Respýblıkasy quramasy Ebola vırýsynyń órshýine baılanysty AQSh engizgen 21 kúndik oqshaýlaný talabyna qaramastan, 2026 jylǵy fýtboldan álem chempıonatyna daıyndyq kestesin ózgertpeıtinin málimdedi, dep habarlaıdy Reuters agenttigi.
Aq úıdiń álem chempıonatyna daıyndyq jónindegi arnaıy tobynyń atqarýshy dırektory Endrıý Djýlıanı Kongo delegatsııasy Belgııadaǵy jattyǵý jıyny kezinde qatań karantın rejımin saqtaýy tıis ekenin aıtty.
Onyń sózinshe, «qaýipsizdik kópirshigi» talaptarynyń buzylýy AQSh-qa kirýge ruqsat bermeýge ákelýi múmkin.
– Biz Kongo quramasyna 11 maýsymda Hıýston qalasyna keler aldynda 21 kún boıy ózderiniń «qaýipsizdik kópirshiginiń» tutastyǵyn saqtaýy mindet ekenin anyq túsindirdik. Áıtpegen jaǵdaıda komanda AQSh-qa kirý múmkindiginen aıyrylýy yqtımal, – dedi Djýlıanı.
Soǵan qaramastan, qurama ókilderi daıyndyq baǵdarlamasy ózgerissiz qalatynyn málimdedi.
Jospar boıynsha komanda 3 maýsymda Belgııanyń Lej qalasynda Danııa quramasymen, al 9 maýsymda Ispanııanyń Kadıs qalasynda Chılı quramasymen joldastyq match ótkizedi.
Jalǵyz ózgeris – komandanyń jankúıerlermen qoshtasý maqsatynda josparlanǵan Kınshasa saparynyń toqtatylýy boldy.
Komanda ókiliniń aıtýynsha, bul sheshim AQSh eskertýinen buryn qabyldanǵan.
– Biz jattyǵý baǵdarlamasyn saqtap qaldyq. Qazirgi quramdaǵy eshbir oıynshy Kongo DR aýmaǵynda turmaıdy. Joldastyq kezdesýler kestede qalady, – dedi qurama ókili.
Týrnır kezinde komanda Hıýstonda ornalasady. K toby aıasyndaǵy alǵashqy matchta Kongo DR quramasy 17 maýsymda Portýgalııa quramasymen kezdesedi.
Odan keıin 23 maýsymda Meksıkanyń Gvadalahara qalasynda Kolýmbııa quramasymen, al 27 maýsymda Atlantada Ózbekstan quramasymen oınaıdy.
Fýtbolshylardyń basym bóligi jáne bas bapker Sebastıan Desabr Eýropada turady. Delegatsııanyń birneshe múshesi Belgııadaǵy jattyǵý lagerine Kongo DR-dan aptanyń basynda kelgen.
Eske sala keteıik, Dúnıejúzilik densaýlyq saqtaý uıymy Kongo Demokratııalyq Respýblıkasynda taralǵan Ebolanyń sırek kezdesetin Býndıbýgıo shtamyna qatysty qaýip deńgeıin «óte joǵary» dárejege kóterdi.
DDU sondaı-aq Kongo DR men kórshiles Ýgandadaǵy indetti halyqaralyq mańyzy bar tótenshe jaǵdaı dep jarııalady. Uıym málimetinshe, Kongo DR-da shamamen 750 kúdikti juqtyrý deregi jáne 177 yqtımal ólim jaǵdaıy tirkelgen.
Buǵan deıin DDU Ebola vırýsy sırek shtamynyń taralýyna baılanysty dabyl qaqqanyn jazdyq.
Al Kongo DR-da ashýly top Ebola shatyr-aýrýhanalaryn órtep jiberdi.
