AQSh kompanııasy ushyrǵan «Blue Ghost» ǵarysh apparaty Aı betine sátti qondy

ASTANA. KAZINFORM — AQSh-tyń jeke menshik Firefly Aerospace aeroǵarysh kompanııasy 2 naýryz kúni ushyrǵan «Blue Ghost» ǵarysh apparatynyń Aı betine sátti qonǵanyn habarlady. Apparat birqatar ǵylymı tapsyrmany oryndap, adamzattyń Aıǵa baǵyttalǵan bolashaq mıssııalary úshin mańyzdy derekter jınaýǵa kómektesedi.

Kompanııanyń resmı saıty usynǵan aqparatqa sáıkes, «Blue Ghost» AQSh ortalyq ýaqyty boıynsha 2 naýryz kúni 02:34-te (Astana ýaqytymen 13:34) Aı betine sátti qondy.

Qoný orny – Aıdyń bergi betiniń soltústik-shyǵys bóligindegi Mare Crisium (Qaýipti teńiz) basseıni. Qurylǵy jetken boıda Aı betinen túsirilgen alǵashqy sýretti Jerge jiberip úlgerdi. 

Firefly Aerospace kompanııasy oqıǵanyń mańyzdylyǵyn atap ótip, ózin tarıhtaǵy ǵarysh apparatyn «Aıǵa tolyqtaı sátti qondyrǵan alǵashqy kommertsııalyq kompanııa» dep málimdedi.

Kompanııa ókilderiniń aıtýynsha, «Aıdaǵy osy kishkentaı qadam kommertsııalyq baǵyttaǵy ǵaryshtyq zertteýler úshin iri sekiris» bolmaq. 

Buǵan deıin, 2024 jyldyń aqpan aıynda, AQSh-tyń Intuitive Machines kompanııasy ushyrǵan «Odysseus» apparaty Aıǵa qonǵanymen tepe-teńdigin saqtaı almaı, bir búıirlep jatyp qalǵandyqtan, mıssııasyn merziminen buryn aıaqtatqan edi. 

«Blue Ghost» NASA-nyń 10 ǵylymı-tehnologııalyq quralyn alyp ushqan. Alda qurylǵy birneshe mańyzdy ǵylymı jobany oryndaıdy. Olardyń qatarynda Aı topyraǵyn burǵylaý, regolıt úlgilerin jınaý jáne radıatsııaǵa tózimdilik boıynsha esepteý júrgizý jumystary bar. 

Firefly Aerospace kompanııasy – NASA-nyń Commercial Lunar Payload Services (CLPS) baǵdarlamasynyń seriktesteriniń biri. Bul baǵdarlama Aı betine ǵylymı eksperımenttik jabdyqtar men júk jetkizýge baǵyttalǵan. AQSh-tyń «Artemis» mıssııasy aıasynda adamdy Aıǵa shyǵarýǵa negiz qalaý basty maqsattarynyń biri sanalady. 

Eske sala keteıik, buǵan deıin «Progress MS-30» ǵarysh kemesi bar zymyran Baıqońyrdan sátti ushyrylǵanyn jazǵan edik.