AQSh kompanııasy Ózbekstan Ulttyq ınvestıtsııalyq qorynyń aktıvterin basqarady

TAShKENT. KAZINFORM - Ózbekstan Respýblıkasynyń Ulttyq ınvestıtsııalyq qory men «Franklin Templeton Asset Management» JShS arasynda ınvestıtsııalyq aktıvterdi senimgerlikpen basqarý týraly kelisimge qol qoıyldy, dep habarlaıdy Kazinform Ózbekstan Ekonomıka jáne qarjy mınıstrliginiń baspasóz qyzmetine silteme jasap.

Ekonomıka jáne qarjy mınıstrliginiń habarlaýynsha, bul kelisim Ózbekstannyń ekonomıkalyq damýyn qoldaý jáne halyqaralyq ınvestorlardy tartý maqsatynda júzege asyrylyp jatyr.

Kelisimge sáıkes, Franklin Templeton qorǵa tıesili 18 memlekettik kásiporyn men kommertsııalyq bankterdiń ınvestıtsııalyq portfelin basqarady jáne olardyń ınvestıtsııalyq tartymdylyǵyn arttyrýǵa baǵyttalǵan transformatsııa baǵdarlamalaryn júzege asyrady.

Osy transformatsııa baǵdarlamalary júzege asyrylǵannan keıin qordyń jáne onyń basqarýyndaǵy kásiporyndar men bankterdiń aktsııalary jergilikti jáne halyqaralyq qor bırjalarynda lıstıngten ótedi.

Osy maqsatta Franklin Templeton qorǵa tıesili memlekettik kásiporyndar men kommertsııalyq bankterdiń strategııalaryn qaıta qaraýǵa, olardyń korporatıvtik basqarý júıesin, qarjylyq tıimdiligin, ishki aýdıt pen táýekelderdi basqarý júıelerin álemdik standarttarǵa beıimdeýge, sondaı-aq qyzmetkerlerdiń biliktiligin jetildirýge baǵyttalǵan transformatsııa baǵdarlamalaryn júzege asyrady.

Franklin Templeton sıngapýrlyq «Franklin Templeton Capital Holdings Private Limited» kompanııasy tarapynan qurylǵan. Óz kezeginde, bul kompanııa 1947 jyly AQSh-ta negizi qalanǵan jáne qazirgi ýaqytta 30-dan astam elde jumys isteıtin álemdegi eń iri kásibı aktıvterdi basqarý kompanııalarynyń biri «Franklin Templeton Investments, Inc.»-tiń enshiles kásiporny.

Eske sala keteıik, Dúnıejúzilik bank Ózbekstan ekonomıkasynyń ósimin 5,8% deńgeıinde boljap otyr.