AQSh kompanııasy ıgeretin volfram kenishine buryn Qytaı kompanııasy da qyzyqqan
ASTANA. KAZINFORM – «Taý-Ken Samuryq» ulttyq taý-ken kompanııasy» aktsıonerlik qoǵamy Kazinform saýalyna joldaǵan jaýapta AQSh kompanııasy ıgeredi delingen volfram kenishiniń Qytaı kompanııasymen baılanysty tarıhyna resmı túsinik berdi.
Memleket basshysy Qasym-Jomart Toqaevtyń AQSh-taǵy «C5+1» sammıti aıasyndaǵy sapary kezinde «Taý-Ken Samuryq» ulttyq kompanııasy men Cove Capital arasynda Qazaqstandaǵy volfram kenishin birlesip ıgerý týraly kelisim jasalǵan bolatyn. AQSh-tyń eksport banki birlesken jobaǵa 900 mln dollar berýge múddeli ekeni de aıtylǵan.
Áńgime Qaraǵandy oblysyndaǵy Soltústik Qatpar ken orny týraly bolyp otyr. 2018 jyly bul kenishke Qytaıdyń Xiamen Tungsten Co., Ltd kompanııasy qyzyǵýshylyq tanytyp, «Taý-Ken Samuryqpen» joba aıasyndaǵy jalpy prıntsıpter men erejelerdi aıqyndaıtyn sheńberlik kelisim jasalǵanyn iskerlik resýrstar jazǵan bolatyn. Arada 7 jyl ótkende atalǵan kenishke AQSh ınvestory kiretini belgili bolyp otyr. Reuters-tiń jazýynsha, AQSh-tyń Cove Capital kompanııasy Soltústik Qatpar jáne Joǵary Qaıraqty kenishterin ıgeretin birlesken kompanııanyń 70%-yna, «Taý-Ken Samuryq» AQ 30%-yna ıelik etpek.
«Taý-Ken Samuryq» kompanııasynyń jaýabynda Qytaı tarapymen bastalǵan kelisim nege aıaqsyz qalǵany aıtylǵan.
- «Taý-Ken Samuryq» UTK» AQ Soltústik Qatpar jáne Joǵarǵy Qaıraqty kenoryndaryna qatysty Xiamen Tungsten Co., Ltd-men zańdy túrde mindetteıtin kelisimder jasasqan joq. 2018 jyly Ózara túsinistik týraly memorandýmǵa jáne Term Sheet-ke qol qoıyldy (atalǵan qujattar «non-binding», ıaǵnı aldyn ala, zańdy túrde mindetti emes). Alaıda keıinirek kompanııanyń negizgi aktsıoneri mámileni maquldamaýyna baılanysty Xiamen Tungsten jobaǵa qatysýdan bas tartty. Buryn habarlaǵanymyzdaı, Soltústik Qatpar jáne Joǵarǵy Qaıraqty kenoryndarynyń qatysý úlesi nemese ıgerý quqyǵy qytaı kompanııasyna berilgen joq, - dep jazylǵan jaýapta.
Osyny alǵa tartqan «Taý-Ken Samuryq» mamandary Cove Capital-men aradaǵy jańa kelisim qytaılyq ınvestormen aradaǵy kelisimdi buzý emes ekenin basa aıtady.
- Joǵaryda aıtylǵandardy eskere otyryp, amerıkalyq tarappen kelissózder men qol jetkizilgen ýaǵdalastyqtar burynǵy kelisimderdi qaıta qaraý nemese ózgertý emes ekendigin jetkizemiz.
Soltústik Qatpar jáne Joǵarǵy Qaıraqty ken oryndaryn ıgerýge qatysý úlesi nemese quqyǵy qytaılyq Xiamen Tungsten Co., Ltd kompanııasyna berilmegenine taǵy da nazar aýdaramyz.
«Taý-Ken Samuryq» UTK» AQ-nyń áreketteri qazaqstandyq zańnamaǵa jáne halyqaralyq kelisimderge qaıshy kelmeıdi, - delingen ulttyq taý-ken kompanııasynyń jaýabynda.
