AQSh kompanııalary qarý-jaraq óndirisin tórt ese arttyrýǵa kelisti – Tramp
ASTANA. KAZINFORM — AQSh-tyń qorǵanys kompanııalary «joǵary deńgeıli» qarý-jaraq óndirisin tórt esege arttyrýǵa kelisti. Bul týraly prezıdent Donald Tramp óziniń TruthSocial áleýmettik jelisindegi akkaýntynda habarlady.
Tramptyń aıtýynsha, olar jaqynda AQSh-tyń eń iri qorǵanys kompanııalarymen óte nátıjeli kezdesý ótkizgen. Onda qarý-jaraq óndirisi men óndiristik kesteler máseleleri talqylanypty.
– Kezdesý barysynda kompanııalar «joǵary deńgeıli» qarý-jaraq óndirisin tórt esege arttyrýǵa kelisti, óıtkeni biz múmkindiginshe qysqa merzimde óndiris kólemin eń joǵary deńgeıge jetkizýdi kózdep otyrmyz, – dedi amerıkalyq kóshbasshy.
Onyń sózine súıensek, óndiristi keńeıtý jumystary bul kezdesýden úsh aı buryn bastalǵan eken. Qazirgi ýaqytta osy sanattaǵy kóptegen qarý túrlerin shyǵaratyn zaýyttar tolyq qýatynda jumys istep jatyr.
– Bizde, mysaly, Iranda qoldanylyp jatqan, sondaı-aq jýyrda Venesýelada paıdalanylǵan orta jáne joǵary orta sanattaǵy oq-dárilerdiń is júzinde sheksiz qory bar, – dedi Tramp.
Degenmen ol soǵan qaramastan, AQSh qarý-jaraqtyń bul túrlerine beriletin tapsyrystar kólemin de ulǵaıtqanyn atap ótti.
Іs-sharaǵa BAE Systems, Boeing, Honeywell Aerospace, L3Harris Missile Solutions, Lockheed Martin, Northrop Grumman jáne Raytheon kompanııalarynyń bas dırektorlary qatysqan.
Kezdesý qorytyndysy boıynsha eki aıdan keıin taǵy bir kezdesý ótkizý josparlanyp otyr.
Sondaı-aq AQSh prezıdenti eldiń ártúrli shtattary jańa zaýyttardy óz aýmaǵynda ornalastyrýǵa ótinim berip jatqanyn jetkizdi.
Eske sala ketsek, 20-dan astam shtat Tramp engizgen jańa tarıfterge qatysty sotqa shaǵymdandy.
