AQSh Kolýmbııa prezıdenti men onyń otbasyna qarsy sanktsııa engizdi

ASTANA. KAZINFORM – Amerıka Qurama Shtattarynyń ákimshiligi Kolýmbııa prezıdenti Gýstavo Petro men onyń otbasy múshelerine qarsy sanktsııalar engizdi, dep habarlaıdy TASS.

AQSh Qarjy mınıstrligi Sheteldik aktıvterdi baqylaý basqarmasynyń (OFAC) málimetinshe, sanktsııalyq tizimge prezıdenttiń jubaıy Veronıka Alkoser Garsııa, uly Nıkolas Petro, sondaı-aq eldiń ishki ister mınıstri Armando Benedettı engizilgen.

23 qazanda AQSh prezıdenti Donald Tramp Kolýmbııa men Meksıka elderi «esirtki kartelderiniń tolyq baqylaýyna ótkenin» málimdedi.

– Kolýmbııa – bul kópten beri bar esirtki ordasy. Bul óte nashar jaǵdaı, – dedi Tramp.

Buǵan deıin Kolýmbııa úkimeti Vashıngtonnyń prezıdent Gýstavo Petrony esirtki óndirý men taratý isine qatysy bar dep aıyptaǵan málimdemesin resmı túrde joqqa shyǵarǵan bolatyn.

Aıta keteıik, AQSh 50-den astam meksıkalyq saıasatker vızalarynyń kúshin joıdy.