AQSh kóktemniń sońyna qaraı Aýǵanstanǵa taǵy 18 myńdaı ásker jóneltkeli otyr

Bul týraly AQSh Qarýly kúshteriniń Shtab basshylary komıtetiniń tóraǵasy admıral Maıkl Mallen málim etti, dep habarlaıdy ITAR-TASS.

AQSh Kongresi Senatynyń qarýly kúshter isteri jónindegi komıtetiniń tyńdaýynda sóılegen sózinde admıral, «qosymsha kúsh quramynan shamamen 4,5 myńdaı amerıkandyq jaýyngerdiń Aýǵanstanǵa jetkizilgenin» naqtylady. Aýǵanstandaǵy ahýaldy turaqtandyrýdyń qaıta qaralǵan strategııasy aıasynda, jeltoqsan aıynda AQSh Prezıdenti Barak Obama Aýǵanstanǵa qosymsha 30 myńdaı amerıkan jaýyngerin jóneltýge ókim bergen bolatyn. «18 myńdaı ásker Aýǵanstanǵa kóktemniń sońyna qaraı baryp qalady degen oıdamyz», dep atap kórsetken admıral, «qalǵan áskerdiń de Aýǵanstanǵa «múmkindiginshe tez, jazda nemese erte kúzde jetkiziletinin» aıtty.