AQSh Qytaıǵa zańsyz jetkizilýi múmkin mıkrochıpterge jasyryn trekerler ornatyp jatyr

ASTANA. KAZINFORM —  AQSh quqyq qorǵaý organdary Qytaıǵa zańsyz jetkizilýi múmkin mıkrochıp partııalaryna jasyryn baqylaý qurylǵylaryn ornatyp jatyr, dep habarlaıdy AZƏRTAC. 

Derekkózderdiń aıtýynsha, bul sharalar AQSh eksporttyq shekteýleriniń buzylýyn anyqtaýǵa baǵyttalǵan jáne tek quqyq qorǵaý organdary tergeý barysynda nazar aýdarǵan jekelegen mıkroshema partııalaryna ǵana qoldanylady. Mıkroshemalardyń ornalasqan jerin baqylaý bılikke eksporttyq baqylaý normalaryn buzǵan tulǵalar men kompanııalarǵa qarsy is qozǵaýǵa negiz beredi.

Reuters derekkózderi ózderine Dell, Supermicro, Nvidia jáne AMD kompanııalary ónimderiniń keıbir partııalaryna jasyryn baqylaý quraldary ornatylǵany belgili ekenin habarlaǵan. Olardyń aıtýynsha, trekerler kóbine qaptamaǵa ornalastyrylady, biraq keıde tikeleı qurylǵynyń ózine de qoıylady.

Buǵan deıin Bloomberg agenttigi Qytaı bıligi keıbir jergilikti kompanııalarǵa amerıkalyq Nvidia kompanııasynyń H20 mıkrochıpterin qoldanýdan bas tartý jóninde eskertý joldaǵanyn habarlaǵan. Mundaı sheshim AQSh chıpteri ornalasqan jerdi baqylap, qashyqtan óshirýi múmkin degen qaýippen túsindirilgen. QHR óz jartylaı ótkizgishter naryǵyn belsendi damytyp, otandyq ónimdi paıdalanýǵa kóshýdi usynyp otyr.

9 tamyzda Financial Times gazeti AQSh Saýda mınıstrliginiń Ónerkásip jáne qaýipsizdik bıýrosy tehnologııalyq kompanııa Nvidia-ǵa Qytaıǵa H20 chıpterin satý úshin lıtsenzııa bergenin jazdy. Bıyl sáýirde AQSh bıligi kompanııaǵa Qytaıǵa chıp jetkizý úshin endi arnaıy lıtsenzııa qajet bolatynyn habarlaǵan. Vashıngton jańa talapty «atalǵan ónim sýperkompıýterde qoldanylýy múmkin» dep túsindirdi.