AQSh Qytaıǵa jóneltetin NVIDIA H200 taýarlary derekteriniń ashyqtyǵyn talap etti
ASTANA. KAZINFORM — AQSh zań shyǵarýshylary Saýda mınıstrliginen Qytaıǵa jasandy ıntellekt júıelerine arnalǵan joǵary ónimdi NVIDIA H200 chıpterin yqtımal jetkizýge berilgen lıtsenzııalar týraly aqparatty naqtylaýdy talap etti, dep habarlaıdy SCMP.
Senator Elızabet Ýorren men kongressmen Gregorı Mıks AQSh Saýda mınıstrligine lıtsenzııalar jónindegi aqparatty jarııa etý týraly ótinishpen júgindi. Hatta olar qytaılyq kompanııalardyń lıtsenzııa alýǵa bergen barlyq ótinimderi týraly málimet surap, sondaı-aq árbir maquldanǵan ruqsat týraly Kongresti onyń berilgen sátinen bastap 48 saǵat ishinde habardar etip otyrýdy talap etti.
Bul úndeýge AQSh prezıdenti Donald Tramptyń NVIDIA H200 chıpterin Qytaıǵa jetkizýge ruqsat berý nıeti týraly málimdemesi sebep bolǵan.
Tramptyń aıtýynsha, AQSh úkimeti mundaı jetkizilimder úshin 25 paıyzdyq komıssııa almaq, al chıpterdi eksporttaý Qytaıdyń jartylaı ótkizgish salasymen básekelestik jaǵdaıynda amerıkalyq óndirýshilerdiń pozıtsııasyn nyǵaıtýǵa yqpal etýi tıis.
Buǵan deıin Tramp NVIDIA kompanııasy Qytaıdaǵy bekitilgen klıentterge H200 chıpterin jetkize alatynyn da málimdegen edi.
Bul sheshim AQSh ákimshiligi ishinde birneshe aptaǵa sozylǵan talqylaýlardan keıin qabyldanǵan jáne Vashıngtonda AQSh prezıdentiniń NVIDIA kompanııasynyń bas dırektory Djensen Hýangpen eksporttyq baqylaý máseleleri qaralǵan kezdesýinen soń jarııa etildi.
Eske salaıyq, Truth Social áleýmettik jelisindegi jazbalarynyń birinde Tramp AQSh-tyń NVIDIA ónimderin ulttyq qaýipsizdik talaptaryn saqtaı otyryp jetkizýge ruqsat berý jospary týraly Qytaı Halyq Respýblıkasynyń tóraǵasy Sı Tszınpındi habardar etkenin aıtyp, qytaı tarapy bul aqparatty oń qabyldaǵanyn atap ótken.
Buǵan deıin NVIDIA alǵash ret 5 trıllıon dollarlyq kompanııa atanǵany habarlanǵan.