AQSh Qytaıdyń keıbir oıynshyq drondaryn ımporttaýǵa ruqsat berdi
ASTANA. KAZINFORM — AQSh-tyń Federaldyq baılanys komıssııasy (FCC) 16 maýsymda Qytaıda óndirilgen oıynshyq drondardyń jańa úlgilerin AQSh naryǵyna ımporttaýǵa ruqsat beretinin málimdedi, dep habarlaıdy Reuters agenttigi.
Reuters agenttiginiń málimetinshe, FCC 2025 jyldyń jeltoqsanynda qytaılyq DJI (Da-Jiang Innovations) jáne Autel Robotics kompanııalary sekildi sheteldik óndirýshilerdiń jańa drondary men negizgi komponentterin AQSh naryǵyna shyǵarýǵa shekteý qoıǵan bolatyn. Retteýshi organ ol kezde bul ónimder ulttyq qaýipsizdikke «qabyldaýǵa bolmaıtyn táýekel» tóndiredi dep málimdegen.
Alaıda keıinnen komıssııa keıbir jańa úlgidegi drondardy ımporttaýǵa kezeń-kezeńimen ruqsat bere bastady.
FCC bul jolǵy sheshim AQSh Qorǵanys mınıstrliginiń qorytyndysyna negizdelgenin atap ótti. Vedomstvo qarapaıym fýnktsııalary bar, qaýip deńgeıi tómen oıynshyq drondar ulttyq qaýipsizdikke qater tóndirmeıdi degen tujyrym jasaǵan.
Qorǵanys mınıstrliginiń baǵalaýynsha, mundaı qurylǵylarda kádimgi drondarǵa tán alys qashyqtyqqa ushý, uzaq ýaqyt áýede bolý, jetildirilgen sensorlar, júk tasymaldaý, jelige qosylý, sondaı-aq derekterdi jınaý jáne saqtaý múmkindikteri joq.
FCC oıynshyq drondarǵa qoıylatyn talaptardyń da qatań ekenin málimdedi.
Atap aıtqanda, olardyń salmaǵy 150 gramnan aspaýy, ushý qashyqtyǵy operatordyń kórý aımaǵymen shektelip, 100 metrden aspaýy tıis. Sonymen qatar qurylǵylar ınternetke nemese basqa jelilerge qosyla almaýy, foto jáne beınekameralarmen, sondaı-aq baqylaý nemese derekter jınaýǵa arnalǵan sensorlarmen jabdyqtalmaýy qajet. Olardyń eń uzaq ushý ýaqyty 10 mınýttan aspaýy kerek.
Buǵan deıin Shanhaı Dısneılendiniń 10 jyl ishinde 100 mıllıonnan astam qonaq qabyldap, Qytaıdaǵy eń tanymal týrıstik nysandardyń birine aınalǵany týraly jazǵanbyz.
