AQSh Qytaıdy jańa ıadrolyq kelisimge qosýdy usynyp otyr
ASTANA. KAZINFORM — AQSh pen Reseı arasyndaǵy Strategııalyq qarý-jaraqty qysqartý týraly kelisimniń merzimi aıaqtaldy, al Tramp oǵan Qytaıdy qosýdy kózdep otyr, dep habarlaıdy Kazinform menshikti tilshisi.
— Biz «SNV jańa kelisiminiń» (Qurama Shtattarmen nashar kelisilgen jáne basqalarymen qatar óreskel túrde buzylyp jatqan) kúshin uzartýdyń ornyna ıadrolyq sarapshylarymyzǵa bolashaqta uzaq ýaqytqa sozylatyn jańa, jetildirilgen jáne jańǵyrtylǵan kelisimshart ázirleýdi tapsyrýymyz kerek, — dep habarlady Donald Tramp Truth Social-da.
AQSh Memlekettik hatshysy Marko Rýbıo sársenbide qarý-jaraqty baqylaý boıynsha kez kelgen jańa kelisimge Beıjińniń ıadrolyq arsenaly AQSh pen Reseıdikinen aıtarlyqtaı az bolǵanyna qaramaastan Qytaı kirýi kerek dep málimdedi, dep habarlaıdy ABC News.
— Prezıdent buǵan deıin de Qytaıdyń úlken jáne tez ósip kele jatqan qoryn eskere otyryp HHІ ǵasyrda naqty qarý-jaraqty baqylaýǵa onyń qatysýynsyz qol jetkizý múmkin emes ekenin anyq aıtqan bolatyn, — dep málimdedi Marko Rýbıo.
Qytaı SІM resmı ókili Lın Tszıan óz eliniń úshjaqty kelisimge qatyspaıtynyn málimdedi.
— Qytaı men AQSh-tyń ıadrolyq kúshteri múldem ár túrli deńgeıde, jáne qazirgi kezeńde Qytaıdyń ıadrolyq qarýsyzdaný kelissózine qatysýyn talap etý ádiletsiz jáne aqylǵa syıymsyz, — dep jaýap berdi Lın Tszıan.
2025 jyldyń qyrkúıeginde Reseı prezıdenti Vladımır Pýtın AQSh-qa «SNV jańa kelisiminiń» kúshin bir jylǵa uzartýdy usyndy, ony Donald Tramp bastapqyda «jaqsy ıdeıa» dep atady.
Alaıda AQSh resmı túrde jaýap bergen joq. Tramptyń jańa kelissózge shaqyrǵan habarlamasyna qaraǵanda, ol sharttyń uzartylýyn qoldaǵan joq.
The New York Times gazetiniń habarlaýynsha, eýropalyq kóshbasshylar Vashıngtonnan táýelsiz ıadrolyq kúshter qurý máselesin talqylaı bastady. Japonııa, Ońtústik Koreıa jáne Túrkııa baǵytty ózgertý múmkindigin talqylap júrgen basqa da ıadrolyq emes memleketterdiń qatarynda.
Bıyl AQSh ıadrolyq arsenalyna 87 mlrd dollar jumsaıdy, onyń ishinde oqtumsyqtardy jańǵyrtý jáne eskirgen zymyrandar men bombalaýshy ushaqtardy qymbatqa túsetin aýystyrý bar.
Buǵan deıin Reseı men AQSh arasyndaǵy ıadrolyq qarýdy qysqartý jónindegi kelisimniń merzimi aıaqtalǵanyn habarlaǵan bolatynbyz.
SNV-III kelisimi ár tarap úshin ornalastyrylǵan strategııalyq ıadrolyq oqtumsyqtar sanyn 1 550 birlikpen shektedi.
Sondaı-aq qurlyqaralyq ballıstıkalyq zymyrandar men aýyr bombalaýshy ushaqtar sekildi jetkizý júıelerine shekteýler engizdi. Kelisim aıasynda derekter almasý, habarlamalar jiberý jáne ornynda tekserý júrgizý sııaqty tekserý tetikteri qarastyrylyp, ózara senimsizdikti azaıtýǵa jáne qate esepteýlerdiń aldyn alýǵa baǵyttalǵan edi.