AQSh Qytaıdan 800 dollarǵa deıingi sálemdemelerdiń baj salyǵynsyz ákelinýin toqtatty

ASTANA. KAZINFORM – AQSh Qytaıdan quny 800 dollardan az shaǵyn sálemdemelerdiń baj salyǵynsyz ákelinýin toqtatty. Tıisti sheshimdi AQSh prezıdenti Donald Tramp qabyldady, dep habarlaıdy CGTN.

SGTN birqatar sarapshylarǵa silteme jasap habarlaýynsha, amerıkalyq tutynýshylar bul qadamnyń saldarynan baǵanyń ósýine jáne taýar jetkizilýiniń keshiktirilýine tap bolady dep boljap otyr. Baǵalaý boıynsha, AQSh-qa kún saıyn quny 800 dollardan az tórt mln-ǵa jýyq sálemdeme keledi. Olardyń kópshiligi Qytaıdan.

Óz kezeginde Qytaı bıligi sálemdemelerdi baj salyǵyn tóleýden bosatýdyń joıylýy amerıkalyq tutynýshylardyń múddelerine eleýli túrde áser etedi dep sendirip otyr. QHR Saýda mınıstrligi halyqaralyq saýdadaǵy kez kelgen ózgeris tutynýshylarǵa qolaılylyqty jaqsartýǵa baǵyttalýy tıis ekenin málimdedi. 

Budan basqa, QHR Saýda mınıstrligi amerıkalyq tarap sońǵy kezderi óz bastamasymen Qytaı tarapyna kedendik baj salyǵy máselesi boıynsha kelissóz júrgizýge daıyn ekendigin bildiretin birneshe ret habarlama jiberýine baılanysty Qytaıdyń baǵalaý júrgizip jatqanyn atap ótti.

- Qytaıdyń ustanymy dáıekti: eger eldi tarıfter men saýda soǵystaryna májbúrlene, onda Qytaı sońyna deıin kúresedi, al eger tarıfterge qatysty máseleler dıalog pen kelissóz arqyly sheshilse, onda Qytaıdyń esigi ashyq, - dep keltiredi Xinhua agenttik ókiliniń málimdemesin.

Buǵan deıin Beıjiń QHR men AQSh kásiporyndarynyń arasynda iskerlik yntymaqtastyqty qoldaýǵa daıyn ekenin jazǵan bolatynbyz.