AQSh Qytaı men Reseıdiń ozyq AI chıpterine qol jetkizýin shektemek: jańa ereje neni ózgertedi
ASTANA. KAZINFORM — AQSh Qytaı, Reseı jáne Iran sııaqty birqatar elderdiń ózge memleketterde ornalasqan derekter ortalyqtary arqyly eń ozyq jasandy ıntellekt chıpterine qol jetkizý múmkindigin shekteıtin jańa ereje ázirlep jatyr. Bul týraly Euronews jazdy.
Dúısenbi kúni AQSh Saýda mınıstrliginiń Ónerkásip jáne qaýipsizdik bıýrosy (BIS) ozyq esepteý júıelerine, sondaı-aq sýperıntellekt (SI) tehnologııalaryna arnalǵan chıpter men serverlerge qashyqtan qol jetkizýdi retteıtin ýaqytsha túpkilikti erejeni jarııalady.
Bıýro málimdemesinde bultty esepteý tehnologııalary men sýperıntellekt ınfraqurylymynyń qarqyndy damýy AQSh-tyń ozyq esepteý qýattaryn qashyqtan paıdalanýdy jeńildetkeni aıtylǵan. Mundaı múmkindik tipti AQSh-tyń eksporttyq shekteýleri qoldanylatyn elderden tys ornalasqan derekter ortalyqtary arqyly da júzege asyrylyp kelgen.
AQSh buǵan deıin Qytaıdyń jasandy ıntellekt salasyndaǵy básekelestikte basymdyqqa ıe bolýyna jol bermeý maqsatynda elge eń ozyq chıpterdi satýǵa shekteý qoıǵan edi. Bul shara burynǵy prezıdent Djo Baıden tusynda qabyldanyp, CHIPS zańymen bekitilgen.
Alaıda keıbir elder amerıkalyq shekteýlerdi aınalyp ótý jolyn tapqan. Qytaı kompanııalary Nvidia sııaqty óndirýshilerdiń eń ozyq chıpterin tikeleı satyp ala almaǵanymen, olardy Ońtústik-Shyǵys Azııa elderindegi derekter ortalyqtarynan jalǵa alyp paıdalanǵan.
Jańa erejege sáıkes, sheteldik derekter ortalyqtary óz klıentteriniń senimdiligin mindetti túrde tekserýge tıis. Bul shara atalǵan elderdegi kompanııalardyń amerıkalyq chıpterdi ozyq jasandy ıntellekt modelderin oqytý úshin paıdalaný múmkindigin shekteýge baǵyttalǵan.
Sonymen qatar Qytaı, Reseı jáne Iran sııaqty táýekeli joǵary elderde bas keńsesi ornalasqan kompanııalarǵa aıtarlyqtaı kólemde esepteý qýatyn usynatyn sheteldik derekter ortalyqtarynyń qyzmetine de shekteýler engiziledi.
Jańa talap 90 kúnnen keıin kúshine enedi. AQSh ákimshiliginiń málimetinshe, kontrabanda qaýpi joǵary elderdegi kompanııalarǵa ozyq chıpterdi eksporttaý úshin arnaıy lıtsenzııa talap etiledi. Olardyń qatarynda Indonezııa, Malaızııa, Sıngapýr, Taıland jáne Brazılııa bar.
Bul shekteýler Nvidia kompanııasyna qatysty tyńshylyq kúdigi týyndaǵan tusta engizilip otyr. Amerıkalyq tergeýshiler Sıngapýrdyń Megaspeed bultty qyzmetter kompanııasy Qytaıdaǵy klıentterine eksporttyq baqylaýǵa jatatyn Nvidia chıpterin alýǵa kómektesti me degen máseleni teksergen.
Nvidia kompanııasynyń negizin qalaýshylardyń biri Djensen Hýang ótken aptada bas dırektor qyzmetinen ketken bolatyn. Buǵan onyń Megaspeed kompanııasynyń burynǵy basshysy Elıs Hýangpen nekeden tys qarym-qatynasta bolǵanyn moıyndaýy sebep bolǵan. Elıs Hýang Qytaı múddesi úshin tyńshylyq jasady degen kúdikke ilingen. Alaıda onyń Djensen Hýangpen týystyq baılanysy joq.
Óz kezeginde Megaspeed kompanııasy Qytaıǵa chıp jetkizdi degen aıyptaýlardy joqqa shyǵardy.
AQSh-tyń bul qadamy prezıdent Donald Tramptyń Qytaıǵa josparlanǵan sapary qarsańynda jasalyp otyr. Sapar aıasynda ekonomıkalyq sammıt ótip, amerıkalyq kóshbasshy Qytaı tóraǵasy Sı Tszınpınmen kezdesedi.
Buǵan deıin Tramp Qytaıdyń tyńshylyq áreketine qatysty máseleni Sı Tszınpınmen talqylaýy múmkin ekenin jazdyq.