AQSh Qytaı kompanııasyna sanktsııa salyp, 10 mıllıon dollar syıaqy jarııalady

ASTANA. KAZINFORM – AQSh Qarjy mınıstrligi Qytaıdyń Sychýan provıntsııasynda ornalasqan «Sychýan Ýshen Aqparattyq Tehnologııalar» kompanııasyna jáne onyń qyzmetkeri Gýan Tıanfenge sanktsııa saldy, dep habarlaıdy LHZB aqparat agenttigi.

Mınıstrlik kompanııany 2020 jyldyń sáýirinde álem boıynsha 80 myńnan astam brandmaýerge zııandy baǵdarlamalar ornatty dep aıyptady. Zııandy baǵdarlamalar málimetterdi urlap qana qoımaı, shıfrlaý arqyly kásiporyndardyń jelilerin isten shyǵaratyn vırýs engizgen.

AQSh-tyń málimetinshe, bul shabýyl 23 myńnan astam brandmaýerge áser etken, onyń ishinde 36-sy mańyzdy ınfraqurylym nysandaryn qorǵaý úshin qoldanylǵan. Málimdemede shabýyl saldary joıylmasa, onyń «aýyr jaraqattar men adam ólimine» ákelýi múmkin ekeni atap ótilgen.

Osyǵan baılanysty, AQSh Ádilet mınıstrligi 10 jeltoqsan kúni Gýan Tıanfenge kompıýterlik jáne elektrondy alaıaqtyq boıynsha aıyp taqty. Sonymen qatar, óziniń, kompanııasynyń nemese hakerlik áreketteri týraly aqparat úshin 10 mıllıon dollar syıaqy jarııalady.

Aıyptaý qujatyna sáıkes, olar brıtanııalyq Sophos kompanııasynyń brandmaýerindegi osaldyqtardy paıdalanyp, shabýyl jasaǵan. Sonymen qatar, olar hakerlik shabýyl arqyly alynǵan derekterdi Qytaıdyń memlekettik mekemeleri men uıymdaryna satty dep aıyptalýda.

Beıjiń óz kezeginde hakerlik jáne basqa da kıbershabýyldarǵa qatysy bar degen aıyptaýlardy joqqa shyǵardy.

Osyǵan deıin keden beketinde elge zańsyz kirgen Qytaı kıimderiniń úlken partııasy anyqtalǵany týraly jazdyq.