AQSh-Qytaı arasyndaǵy baj salyǵyn qysqartý kelisimi aıasynda aktsııa baǵalary qymbattady
ASTANA. KAZINFORM — Dúısenbide AQSh pen Qytaı ózara tarıfterdi 90 kúnge tómendetýge keliskennen keıin aktsııa baǵalary kúrt ósti, dep habarlaıdy Investopedia.
Dow Jones ındeksi 2,8%-ǵa ósti, al S& P 500 jáne Nasdaq ındeksi sáıkesinshe 3,3%-ǵa jáne 4,4%-ǵa kóterildi.
Investorlar demalys kúnderi AQSh pen Qytaı sheneýnikteri arasyndaǵy kelissóz qorytyndysyn taǵatsyzdana kútkendikten, aktsııalar ótken aptanyń sońynda tosý kúıinde boldy.
Dúısenbide álemdegi eń iri tehnologııalyq kompanııalardyń aktsııalary barlyq baǵyt boıynsha kúrt ósti. Tizimde eń birinshi shamamen 8% ósimmen Amazon jáne Meta tur. Apple men Tesla aktsııalary 6%-dan astam ósti, al chıp óndirýshi Nvidia jáne Broadcom aktsııalarynyń baǵasy sáıkesinshe 5,5% jáne 6,5%-ǵa ósti. Alphabet aktsııalary 3%-dan astam, al Microsoft 2%-ǵa jýyq ósti.
Marvell Technology jáne Micron aktsııalary shamamen 8% ósti, al ON Semiconductor jáne Microchip Technology sáıkesinshe 9% jáne 10% ósti. VanEck Semiconductor ETF kúndi 6%-dan astam ósimmen aıaqtady.
Nike aktsııalarynyń baǵasy 7%-dan astam, al jetkizý kompanııalary United Parcel Services jáne FedEx sáıkesinshe 6% jáne 7%-ǵa jýyq ósti.
Qytaılyq Alibaba elektrondyq kommertsııa kompanııasynyń aktsııalary shamamen 6%-ǵa, Carnival krýızdik jeli operatory 10%-ǵa, Lululemon 9%-ǵa jáne Best Buy elektronıka satýshysy 6,5%-ǵa qymbattady. Shopify elektrondyq kommertsııa platformasynyń aktsııalary 14% ósti.
Álemdegi eń iri altyn óndirýshi Newmont Mining kompanııasynyń aktsııalary qymbat metall baǵasynyń tómendeýine baılanysty 6 paıyzǵa arzandady. Bir apta buryn bir ýntsııa úshin shamamen 3500 dollarǵa saýdalanǵan altyn fıýchersteri dúısenbide 3,1 paıyzǵa, 3240 dollarǵa deıin arzandady.
AQSh-tyń West Texas Intermediate markaly munaı fıýchersteri 1,5 paıyzǵa ósip, 62,05 dollardy qurady.
Bıtkoın 102 500 dollarǵa saýdalanyp, túndegi 105 700 dollar maksımýmnan tómendegen. Ótken aptada tsıfrlyq valıýta baǵasy aqpan aıynan beri alǵash ret 100 myń dollardan asyp tústi.
Osyǵan deıin AQSh pen Qytaı Shveıtsarııadaǵy kelissózder nátıjesinde saýda soǵysy aıasynda bir-birine qarsy engizgen eksporttyq baj salyǵyn 90 kúnge tómendetý týraly kelisimge kelgenin jazdyq.