AQSh kelissózder aldynda Iranǵa qarsy jańa sanktsııalar engizdi
ASTANA. KAZINFORM — Sanktsııa tiziminde 5 uıym men bir jeke tulǵa bar, dep habarlaıdy Kazinform tilshisi.
Donald Tramp Tegeranmen ıadrolyq baǵdarlama boıynsha tikeleı kelissózderdi bastaýǵa daıyn ekenin málimdegennen eki kún ótkende AQSh Iranǵa qarsy jańa sanktsııalar jarııalady. Bul týraly sársenbide AQSh Qarjy mınıstrligi habarlady.
Sanktsııalar tizimine eldiń ıadrolyq baǵdarlamasyn qoldaǵany úshin bes ırandyq kompanııa men bir Iran azamaty engizilgen. Vedomstvo málimdemesinde aıtylǵandaı, shekteýlerdiń maqsaty — Tegerannyń ıadrolyq qarýǵa ıe bolýyna jol bermeý.
— Iran rejıminiń oısyz ıadrolyq qarýǵa umtylýy Amerıka Qurama Shtattaryna, aımaqtyq turaqtylyqqa jáne jahandyq qaýipsizdikke úlken qater bolyp qala beredi, - dedi AQSh qarjy mınıstri Skott Bessent.
Ol Vashıngtonnyń Irannyń ıadrolyq ambıtsııasyn tejeý úshin qolda bar barlyq quraldy paıdalanýdy jalǵastyratynyn basa aıtty.
Jańa sharalar buryn sanktsııalanǵan sýbektilerge — Irannyń Atom energııasy uıymyna (AEOI) jáne onyń enshiles uıymy Iran Centrifuge Technology kompanııasyna (TESA) qoldaý kórsetetin qurylymdarǵa qatysty. Olardyń arasynda TESA úshin alıýmınıı óndirýshi jáne torıı reaktory tehnologııasyn ázirleýshi kompanııa bar.
Jańa sanktsııalar Tramp osy aptanyń basynda AQSh-tyń Iranmen tikeleı kelissózderge daıyn ekenin aıtqan soń engizildi.
Iran kelissózderge kelisti, biraq AQSh-tan áskerı qoqan-loqqy jasaýdy toqtatýdy talap etti.
Kelissózder aldaǵy senbi, 12 sáýirde Oman Sultanatynda ótedi dep kelisildi. Kezdesýdiń formaty áli anyqtalǵan joq: Tramp tikeleı kelissózder ótetinin aıtsa, Iran Syrtqy ister mınıstri Abbas Aragchı Tegeran janama oıynshy bolýy kerek degen ustanymyn qaıtalady.
Sársenbi kúni AQSh energetıka mınıstri Iran kelisimdi oryndaýdan bas tartqan jaǵdaıda jańa sanktsııalar engizetinin aıtyp qorqytty.