AQSh Qazaqstannyń DSU-ǵa kirýin qoldaıdy -Djon Kerrı

ASTANA. QazAqparat - AQSh Qazaqstannyń Dúnıejúzilik saýda uıymyna kirýin qoldaıdy, dep málimdedi dúısenbi kúni Nıý-Iorkte Qazaqstannyń Syrtqy ister mınıstri Erlan Ydyrysovpen kezdesýi qorytyndysy boıynsha AQSh memlekettik hatshysy Djon Kerrı.

Bul týraly RIA Novostı habarlady.

«Memlekettik hatshy Kerrı Qazaqstannyń DSU-ǵa kirýin qoldaıtynyn jetkizdi», - dep málimdedi jýrnalısterge memlekettik departamenttiń ókili.

Djon Kerrı sondaı-aq AQSh-tyń "Qazaqstannyń egemendigin, aýmaqtyq tutastyǵy men álemdik arenada ósip kele jatqan kóshbasshylyq rólin " qoldaıtynyn aıtty. Kerrı men Ydyrysov óńirlik jáne jahandyq problemalardy sheshýdegi strategııalyq áriptestik pen yntymaqtastyq máselelerin talqylady, dep túıindedi AQSh memlekettik departamentiniń ókili. Kezdesý BUU Bas assambleıasy alańynda ótti.