Almatydaǵy áleýmettik nysandar men turǵyndardyń máselesin Májilis depýtattary nazarǵa aldy
ALMATY.KAZINFORM — Májilis depýtattary, «AMANAT» partııasy fraktsııasynyń músheleri Aıgúl Quspan, Sergeı Ponomarev jáne Aıdos Sarym Almaty qalasynyń halqymen kezdesýler ótkizdi. Sondaı-aq, shahardaǵy birqatar áleýmettik ınfraqurylym jáne mádenıet nysandaryn aralady. Bul týraly Májilistiń baspasóz qyzmeti málim etti.
— Aıdos Sarym júrgizgen azamattardy qabyldaý barysynda áleýmettik qoldaý, turǵyn úı quqyqtary, medıtsınalyq kómektiń qoljetimdiligi, dárilik zattarmen qamtamasyz etý jáne qalany damytý máseleleri kóterildi. Turǵyndardyń ótinishi boıynsha qoldanystaǵy zańnama sheńberinde túsinikteme berildi, keı máseleler odan ári qaralatyn boldy, — delingen habarlamada.
Sergeı Ponomarev Muhtar Áýezov atyndaǵy Memlekettik akademııalyq teatr ǵımaratynda bolyp, nysannyń jaı-kúıimen, bıyl qarasha aıynda aıaqtalýy tıis qaıta jóndeý jumysynyń barysymen tanysty. Jóndeý jumysy qazir toqtap tur. Depýtat rekonstrýktsııany aıaqtaý máselesi respýblıkalyq deńgeıge shyǵarylyp, obektiniń tarıhı jáne mádenı mańyzdylyǵyn eskere otyryp sheshilýge tıis ekenin atap ótti.
Aıgúl Quspan Ulttyq qaýipsizdik komıteti Shekara qyzmetiniń Almaty oblysyndaǵy tehnıkalyq jáne kásiptik oqý bólimshesine bardy. Depýtat bólimsheniń materıaldyq-tehnıkalyq jabdyqtalý deńgeıimen, jeke quramnyń qyzmet kórsetý jáne oqytý sharttarymen, sondaı-aq medıtsınalyq pýnkttiń jumysymen tanysty. Sanıtarlyq beıindegi maman daıarlaý, áskerı qyzmetshilerdi turǵyn úımen qamtamasyz etý jáne vedomstvoaralyq ózara is-qımyl máselelerine nazar aýdaryldy.
Májilis ókilderi sondaı-aq «AMANAT» partııasynyń saılaýaldy baǵdarlamasy aıasynda salynyp jatqan Naýryzbaı aýdanynyń Shuǵyla shaǵyn aýdanyndaǵy II tıpti órt sóndirý deposynyń qurylysymen tanysty. Jańa depo Órt sóndirý bólimsheleriniń oqıǵa ornyna jetý ýaqytyn edáýir qysqartýǵa, qurylys qarqyndy júrip jatqan aýdan turǵyndaryn qorǵaý deńgeıin arttyrýǵa múmkindik beredi. Qurylysy josparly rejımde júrip jatqan nysan 2026 jyldyń sońyna deıin tapsyrylýǵa tıis.
Depýtattar shuǵyl qyzmetterdiń daıyndyǵy máseleleri qala turǵyndarynyń ómir súrý sapasyna men qaýipsizdigine tikeleı baılanysty ekenin atap ótti.
Buǵan deıin Qonaevta sý jelisine qatysty múlik daýy shyǵyp, depýtat prokýrormen kezdeskenin jazdyq.