AQSh Qazaqstannyń Reseı munaıyn Qytaıǵa tranzıtteý merzimin taǵy bir jylǵa uzartty
ASTANA. KAZINFORM — Energetıka mınıstrligi Qazaqstannyń Reseı munaıyn Qytaıǵa tranzıtteýge múmkindik beretin lıtsenzııa merzimi taǵy bir jylǵa uzartylǵanyn málim etti.
— OFAC-pen (AQSh Qarjy mınıstrliginiń Sheteldik aktıvterdi baqylaý basqarmasy — red) júrgizilgen kelissóz nátıjesinde Reseı munaıyn Qytaı Halyq Respýblıkasyna tranzıtteýge berilgen lıtsenzııanyń merzimi 2027 jylǵy 19 naýryzǵa deıin uzartyldy.
Tasymaldaý kólemin ulǵaıtý máselesi Qazaqstan men Reseı Federatsııasynyń Energetıka mınıstrlikteri arasynda talqylanyp jatyr. Osylaısha, Reseı munaıyn Qytaıǵa tranzıtteý sanktsııalyq shekteýlerden tys berilgen arnaıy ruqsat negizinde jalǵasyp jatyr. Jaǵdaı turaqty baqylaýda, — dep jazylǵan mınıstrliktiń resmı málimetinde.
Bloomberg Energetıka mınıstrliginen AQSh ákimshiligi Qazaqstanǵa Reseı munaıyn Qytaıǵa qubyr arqyly tranzıtteýdi kelesi jyldyń naýryzyna deıin jalǵastyrýǵa ruqsat beretini týraly málimet alǵan jazdy.
Interfax agenttiginiń málimetinshe, buǵan deıin OFAC bergen lıtsenzııa osy jyldyń sáýirine deıin jaramdy bolǵan.
— Bul ruqsat Qazaqstanǵa Reseı munaıynyń myńdaǵan barrelin Qytaıǵa tranzıtteı berýge múmkindik ashady. Atalǵan sheshim Taıaý Shyǵystaǵy soǵys saldarynan munaı naryǵy turaqsyz kúıge túsken kezeńge tuspa-tus keldi, — dep jazady Bloomberg.
Iran bıliginiń Ormýz buǵazyn jabýy Azııadaǵy munaı tutynýshy ekonomıkalaryn da tyǵyryqqa tirep otyr.
Bloomberg AQSh-tyń bul qadamy Qytaımen birge Reseıge túsetin qysymdy da jeńildetetinin aıtady.
Reseımen aradaǵy kelisim boıynsha Qazaqstan Qytaıǵa jyl saıyn tranzıt arqyly 10 mln tonna munaı jetkizedi. Bul shamamen táýligine 200 myń barrel degen sóz.
Ekijaqty kelisim boıynsha Reseı Qazaqstan aýmaǵy arqyly Qytaıǵa jyl saıyn 10 mln tonna munaı jetkizip keledi.
Al Qazaqstan munaıy Reseı aýmaǵy arqyly 4 baǵytpen tranzıteledi:
— «Atyraý-Samara — Adamova Zastava;
— Atyraý-Samara — Ýst-Lýga;
— KTK qubyry
— Atyraý — Sarama– Shesharıs;
— Kaspıı qubyry.
