AQSh Qazaqstannan sálemdemeler qabyldaýdy ýaqytsha toqtatty

ASTANA. KAZINFORM – AQSh Qazaqstannan sálemdemeler qabyldaýdy ýaqytsha toqtatty. Bul týraly «Qazposhta» AQ málim etti.

- «Qazposhta» AQ AQSh Shekara-keden qyzmetiniń 2025 jylǵy 26 tamyzdaǵy sheshimine baılanysty AQSh-taǵy mekenjaıǵa baǵyttalǵan sálemdemelerdi qabyldaý jáne jetkizý ýaqytsha toqtatylatynyn habarlaıdy. Hattar men qujattardy jiberý qalypty túrde jalǵasady, - delingen kompanııa taratqan aqparatta.

Taratylǵan málimetke qaraǵanda, shekteýdi amerıkalyq tarap engizdi jáne ol kóptegen elden keletin halyqaralyq poshta jóneltilimderine qoldanylady. Qazirgi kezde Dúnıejúzilik poshta odaǵyna múshe 192 memlekettiń tek beseýi ǵana AQSh-qa taýary bar sálemdeme jibere alady.

- «Qazposhta» AQ seriktestermen turaqty baılanysta jáne qyzmetti jyldam qalpyna keltirý úshin belsendi kelissózder júrgizip jatyr, - dep atap ótedi kompanııadan.

Aıta keteıik, jyl basynda áleýmettik jelilerde «Qazposhta» AQ joǵalǵan sálemdemelerdi tómen baǵaǵa satady degen jalǵan habarlamalar taraǵan edi.