AQSh Qazaqstannan 49 jylǵa jer telimin jalǵa alady — Senat zańdy maquldady

ASTANA. KAZINFORM — Senat «Qazaqstan Respýblıkasynyń Úkimeti men AQSh Úkimeti arasyndaǵy Almaty qalasynda AQSh-tyń konsýldyq mekemesin salýǵa jer ýchaskesin jalǵa berý týraly kelisimdi ratıfıkatsııalaý týraly» zańdy maquldady.

— Atalǵan kelisim Memleket basshysynyń Birikken Ulttar Uıymynyń 74-sessııasyna qatysý qorytyndysy boıynsha bergen tapsyrmasyn iske asyrý maqsatynda ázirlendi. Qujat sheńberinde AQSh Úkimetine Almaty qalasynda konsýldyq mekeme ǵımarattaryn salý úshin 70 593 sharshy metr jer ýchaskesi 49 jyl merzimge jalǵa beriledi. Bul sheshim halyqaralyq dıplomatııalyq tájirıbege tolyqtaı saı keledi. Máselen, Koreı Halyq Demokratııalyq Respýblıkasy Elshiligine Ulybrıtanııada jáne AQSh konsýldyǵyna Gonkongta 999 jylǵa jalǵa jer berilgen. Bul seriktestik qatynastardyń uzaqmerzimdiligi men senimge negizdelgen qalypty praktıka, — dedi Senat depýtaty Amangeldi Nuǵmanov Senat otyrysynda.

Senatordyń málimdeýinshe, Almaty qalasyndaǵy Bas konsýldyqtyń aýmaǵynda AQSh-tyń esirtkimen kúres agenttigi, Qazaqstan Respýblıkasyndaǵy Saýda mınıstrliginiń ókildigi kiredi. 
Onyń negizgi mindeti — amerıkalyq kompanııalardyń qazaqstandyq naryqqa shyǵýyna járdemdesý, sondaı-aq AQSh pen Qazaqstan arasyndaǵy saýda-ekonomıkalyq yntymaqtastyqty damytý.

— Kelisim boıynsha jer ýchaskesin berý tártibi men sharttary naqty belgilengen. Jalǵa alý merzimi úshin jaldaý aqysy 25 mıllıon AQSh dollaryn quraıdy jáne bul soma kelisim kúshine engen kúnnen bastap 30 kún ishinde birden tóleıdi. Sonymen qatar AQSh Úkimeti jer ýchaskesi men konsýldyq ǵımaratqa qatysty barlyq salyq pen basqa da tólemderden bosatylady. Sondaı-aq konsýldyq ǵımarattyń qurylysyna, onyń kútimi men jóndeýine, baılanys qyzmeti men elektr, gaz, sý, jylý jáne basqa da kommýnaldyq qyzmetke qatysty barlyq shyǵyn AQSh Úkimetiniń esebinen júzege asyrylady. Konsýldyqty jabdyqtaý men jıhazdaý úshin AQSh Úkimeti ımporttaıtyn barlyq materıal men taýar kedendik tólemderden, ımport salyǵynan jáne ruqsat alýǵa qatysty talaptardan bosatylady, — deıdi ol.

Odan bólek, taraptar arasyndaǵy kelisimge sáıkes, qujat ratıfıkatsııalanǵannan keıin AQSh tarapy Qazaqstan Respýblıkasynyń Hıýston qalasynda Bas konsýldyq ashýyna ruqsat beredi.

— Hıýston — jasandy ıntellektti paıdalana otyryp sheshimder ázirleıtin jetekshi tehnologııalyq kompanııalar men startaptardyń ortalyǵy, sondaı-aq ınnovatsııa, energetıka jáne medıtsına salasynda úlken múmkindikterge ıe qala. Hıýstonda konsýldyq ashý AQSh-pen ınvestıtsııalyq jáne ekonomıkalyq yntymaqtastyqty nyǵaıtýǵa múmkindik beredi, sondaı-aq qazaq dıasporasy úshin konsýldyq jáne notarıattyq qyzmetterge qoljetimdilikti arttyrady. Almatydaǵy AQSh Bas konsýldyǵy Ortalyq Azııadaǵy eń iri vızalyq ortalyqqa aınalady. Bul Qazaqstannyń ınvestıtsııalyq tartymdylyǵyn arttyryp, tikeleı sheteldik ınvestıtsııany tartýǵa, jańa jumys oryndaryn qurýǵa jáne bıznes pen qyzmet kórsetý salasynyń damýyna yqpal etedi, — dep tolyqtyrdy depýtat.

Sondaı-aq senator kelisimdi ratıfıkatsııalaý halyqaralyq seriktesterdiń elimizge degen senimi artatynyn aıtyp otyr. 

Eske salaıyq, bıyl naýryzda Májilis AQSh-qa Almatyda konsýldyq ǵımarat salýǵa 49 jylǵa jalǵa jer berý týraly zań jobasyn qabyldady.