AQSh Qazaqstanǵa gýmanıtarlyq kómek retinde COVID-19 vaktsınasyn bermek

ASTANA. QazAqparat – AQSh tarapy Qazaqstanǵa gýmanıtarlyq kómek retinde «Pfizer» vaktsınalaryn berýi múmkin. Bul týraly ashyq talqyǵa shyǵarylǵan Qazaqstan Úkimeti men AQSh-tyń Densaýlyq saqtaý jáne áleýmettik qamsyzdandyrý mınıstirligi arasyndaǵy gýmanıtarlyq kómek kórsetý týraly kelisim qujatynda jazylǵan, dep habarlaıdy QazAqparat tilshisi.

«Kelisim aıasynda AQSh-ta 5-11 jas aralyǵyndaǵy balalarǵa shuǵyl qoldaný úshin maquldanǵan, biraq búginge deıin AQSh-tyń Azyq-túlik jáne dári-dármek basqarmasy (FDA) bekitpegen jáne lıtsenzııalamaǵan «Pfizer-BioNTech» óndirgen COVID-19 vaktsınasyn berý qarastyrylady», - delingen kelisim qujatynda.

Bul oraıda, taraptar kelisimi negizinde vaktsınamen jumys isteýdegi jaýapkershilik Qazaqstanǵa júkteledi. Sonymen qatar, el Úkimeti ekpelerdi elge ýaqytyly jetkizý baǵytyndaǵy qajetti sharalardy qabyldaıdy.

«Bul rette Qazaqstanǵa ımporttalatyn atalǵan materıaldar salyqtar men ózge de tólemderden bosatylady», - dep kórsetilgen qujatta.

Bul kelisimge Qazaqstan Úkimetiniń atynan Densaýlyq saqtaý mınıstri Ajar Ǵınııatqa qol qoıýǵa ýákilettik berilgen.

Qujatty ashyq talqylaý 21 qarashaǵa deıin jalǵasady.