AQSh qazaqstandyqtardyń esep-shottary týraly aqparat berip turýǵa kelisti

ASTANA. QazAqparat - QR Qarjy mınıstri Baqyt Sultanov pen AQSh-tyń Qazaqstandaǵy elshisi Djordj Kroll eki eldiń úkimetteri arasyndaǵy xalyqaralyq salyq tártibin jetildirý týraly kelisimdi rásimdedi, dep xabarlaıdy QazAqparat tilshisi.

Mınıstr Sultanovtyń aıtýynsha, atalǵan qujat - uzaq ári kúrdeli jumystyń nátıjesi. Onyń aıasynda Qazaqstan men Amerıka salyqtan jaltaryp júrgen azamattar men olardyń esep-shottary týraly aqparatpen almasatyn bolady. «Bul jumys osydan birneshe jyl buryn Amerıka Qurama Shtattarynyń bastamasymen bastalǵan bolatyn. Endi, mine, búgin biz arnaıy kelisimge qol qoıyp otyrmyz. Qazaqstan óz tarapynan barlyq amerıkalyq kompanııalar men jeke tulǵalardyń jeke shottaryndaǵy aqsha týraly aqparatty Amerıkaǵa jiberedi. Dál sondaı aqparat bizge de keledi. Biraz jyldan biz jalpyǵa ortaq deklaratsııalar jaıynda aıtyp jatyrmyz ǵoı. Syrtta júrgen qazaqstandyq azamattardyń aqshasyn qalaı baqylaımyz? Salyq rásimdeý jaǵy qalaı bolady? Búgingi qujat - sol júıeli sharalardyń biri», - dep atap kórsetti B.Sultanov.

Óz kezeginde elshi Kroll alǵys bildirip, AQSh-ta osy saladaǵy jumystyń «Sheteldik esep-shottarǵa salyq salý» týraly zańnyń aıasynda júrgiziletinin jetkizdi. «Al aqparat almasý arqyly biz offshordyń kómegimen salyqtan jaltarý áreketterimen kúrese alamyz. Búgingi kelisim de osy saladaǵy yntymaqtastyqtyń, salyqtyq tártipti ornatýǵa degen ortaq qulshynystyń kórinisi bolsa kerek», - dep atap kórsetti Krol.