AQSh Qazaqstandaǵy demokratııalyq ózgeristerdi oń baǵalap otyr - Marıan Ábisheva
Meniń oıymsha jalpy alǵanda Prezıdent Qasym-Jomart Toqaevtyń basshylyǵymen elimizdegi demokratııalyq ózgeristerdiń kezekti kezeńi sheteldegi saıası jáne saraptamalyq toptarda úlken rezonans týdyrdy. Tanymal BAQ-taǵy mundaı maqalalar - jaqsy kórsetkish. Bul neni kórsetedi?
Birinshiden, bizdiń elimiz –AQSh-tyń mańyzdy syrtqy saıası seriktesi. Qurama Shtattarymen birge Qazaqstan jahandyq qaýipsizdik, óńirlik damý jáne ekijaqty jobalar boıynsha belsendi jumys isteýde. Sondaı-aq amerıkalyqtar elimizdegi progresti muqııat qadaǵalap, Qazaqstan demokratııasynyń dáıekti túrde nyǵaıýyn qoldaıtyny belgili. Osy jyldar ishinde Vashıngton elimizdegi demokratııalyq reformalardy qoldaý úshin kóp jumys atqardy. Olardyń qatarynda jumys konsýltatsııalary, trenıngter, sondaı-aq AQSh-taǵy qazaqstandyq ókilder úshin amerıkalyq saıası júıe men onyń ınstıtýttarynyń qalaı jumys isteıtinin túsindirýge arnalǵan tanysý saparlary bar. Óz kezeginde bul sheteldik tájirıbeni zerdeleýge jáne saıası jańǵyrtýdyń qazaqstandyq baǵdarlamasyn ázirleý kezinde óte kóp kómektesti.
Ekinshiden, AQSh Qazaqstannyń sanaly túrde jáne óz bastamasy boıynsha saıası modernızatsııany júzege asyryp jatqanyn jáne evolıýtsııalyq modeldi iske asyrý qajettiligi týraly berik ustanymyn qurmettep, joǵary baǵalaıdy. Óıtkeni, QR Tuńǵysh Prezıdenti N. Nazarbaev táýelsizdiktiń alǵashqy kúninen bastap «aldymen ekonomıka, sodan keıin saıasat» degen memlekettik damýdyń pragmatıkalyq formýlasyn basshylyqqa aldy. Bul rette AQSh bizdiń elimizge ekonomıkalyq qoldaý kórsetip, ósip kele jatqan jas ekonomıkamyzǵa mıllıardtaǵan ınvestıtsııa salǵan alǵashqy elderdiń biri boldy. Búgingi tańda amerıkalyq kompanııalar Qazaqstanda sheteldik ınvestıtsııalar kólemi boıynsha áli kúnge deıin kósh bastap keledi. Osylaısha, Elbasynyń ekonomıkany nyǵaıtý jáne onyń berik negizi -demokratııany damytý týraly ıdeıasyna qoldaý kórsetildi.
Úshinshiden, Vashıngton óz ınvestıtsııalarynyń tıimdiligi men Qazaqstandaǵy saıası damýdyń nátıjelerin kórip otyr. Keshe AQSh prezıdenti Tramp Memleket basshysy Qasym-Jomart Toqaevqa Qazaqstan Prezıdenti laýazymyna kiriskenine bir jyl tolýyna oraı quttyqtap, jedelhat joldaǵan bolatyn. Óziniń quttyqtaý jedelhatynda AQSh kóshbasshysy: «Sizdiń saıası jańarýǵa baǵyttalǵan reformalyq, órshil baǵdarlamańyz erekshe maqtaýǵa laıyq. Halyqtyń Úkimetke degen senimin arttyrý, gúldengen jáne serpindi qoǵamnyń negizgi irgetasy sanalatyn bostandyqtardy qorǵaýdy kúsheıtý boıynsha alǵa qoıǵan maqsattaryńyzdy Amerıka Qurama Shtattary qoldaıdy. Biz keńeıtilgen strategııalyq áriptestigimizdiń aıasynda osy bastamalardy iske asyrýda árdaıym Sizben seriktes bolýǵa daıynbyz» degen bolatyn.
Qazaqstan óziniń turaqty damýyn jalǵastyrýda. Al tanymal basylymdardaǵy mundaı maqalalar bir jaǵynan jasalyp jatqan is-qımyldardyń durystyǵyn kórsetse, ekinshi jaǵynan ári qaraı damýǵa yntalandyrady.
Marıan Ábisheva
QR Prezıdenti janyndaǵy Memlekettik basqarý akademııasy Dıplomatııa ınstıtýtynyń dırektory
