AQSh Qazaqstan men Ózbekstanǵa avtobýstaǵy qaıǵyly oqıǵaǵa baılanysty kóńil aıtty

NЬıÝ-IORK. QazAqparat - AQSh Memlekettik hatshysynyń orynbasary Djon Sallıvan Aqtóbe oblysy aýmaǵynda avtobýstyń órtenýinen adamdardyń qaza bolýyna baılanysty Qazaqstan men Ózbekstanǵa kóńil aıtty, dep habarlaıdy QazAqparat tilshisi.

«Osy múmkinshilikti paıdalana otyryp Qazaqstanda avtobýsta oryn alǵan qaıǵyly jaǵdaıda Ózbekstannyń elýden astam azamatynyń qaza bolýyna baılanysty Qazaqstan men Ózbekstannyń úkimetterine jáne qaza tapqandardyń otbasylaryna kóńil aıtýǵa ruqsat etińizder»,- dedi ol BUU Qaýipsizdik Keńesiniń mınıstrler deńgeıindegi otyrysy barysynda.

Eske salaıyq, tótenshe jaǵdaı Aqtóbeden 320 shaqyrym qashyqtyqta, Qalybaı kentinen 10 shaqyrym jerde «Samara-Shymkent» tasjolynyń boıynda bolǵan. Avtobýsta Ózbekstannyń 54 azamaty men 3 qazaqstandyq bolǵan. Avtobýsta shyqqan órt saldarynan 52 ózbekstandyq qaza tapty. Tiri qalǵandardyń arasynda 3 qazaqstandyq jáne 2 ózbekstandyq bar. Olardy jeńil deńgeıde kúıik shalǵan.