AQSh Qazaqstan ekonomıkasyna 60 mlrd dollardan astam ınvestıtsııa saldy
ASTANA. KAZINFORM -Qazaqstan men AQSh arasyndaǵy saýda-ekonomıkalyq yntymaqtastyq keńeıip keledi. Bıylǵy birinshi toqsanda eki el arasyndaǵy taýar aınalymy 1 mlrd dollardan asyp, ótken jyldyń sáıkes kezeńimen salystyrǵanda shamamen 10 paıyzǵa ósti.
Bul týraly Astanada ótip jatqan Qazaqstan–AQSh iskerlik dóńgelek ústelinde «Atameken» UKP tóraǵasynyń orynbasary, Qazaqstannyń Syrtqy saýda palatasynyń tóraǵasy Murat Qarymsaqov málim etti.
Onyń aıtýynsha, AQSh Qazaqstan táýelsizdik alǵannan bergi eń iri ınvestorlardyń biri sanalady. Osy ýaqytqa deıin amerıkalyq kompanııalar el ekonomıkasyna 60 mlrd dollardan astam tikeleı ınvestıtsııa quıǵan.
- Bıyl Qazaqstan men AQSh arasynda dıplomatııalyq qarym-qatynastyń ornaǵanyna 35 jyl tolyp otyr. Osy ýaqyt ishinde Amerıka Qurama Shtattary Qazaqstan ekonomıkasyna eń kóp ınvestıtsııa salǵan elderdiń birine aınaldy. Búginde amerıkalyq ınvestıtsııalardyń jalpy kólemi 60 mlrd dollardan asty. Ótken jyldyń qarasha aıynda Memleket basshysynyń AQSh-qa sapary kezinde quny 25 mlrd dollardan asatyn ınvestıtsııalyq kelisimderge qol qoıyldy. Bul kelisimder ónerkásip, energetıka, IT, kólik-logıstıka jáne aýyl sharýashylyǵy sııaqty strategııalyq salalardy qamtıdy, – dedi Murat Qarymsaqov.
Onyń sózinshe, Qazaqstan jańa energetıka baǵyttaryn damytýǵa basymdyq berip otyr. Osyǵan baılanysty amerıkalyq kompanııalarmen ónerkásiptik kooperatsııany keńeıtý, aýyl sharýashylyǵy jobalaryn júzege asyrý jáne kólik-logıstıka salasyndaǵy birlesken bastamalardy iske asyrý josparlanǵan.
Sondaı-aq iri logıstıkalyq ortalyqtar men habtar salý máselesi qarastyrylyp jatyr. Bul jobalar ózara saýda kólemin ulǵaıtyp, ınvestıtsııalyq yntymaqtastyqty jańa deńgeıge shyǵarýǵa múmkindik beredi.
Aıta keteıik, Astanada ótip jatqan Qazaqstan–AQSh iskerlik dóńgelek ústeline Chevron, Shell, Apple, Mastercard, Citi jáne basqa da halyqaralyq kompanııalardyń ókilderi qatysyp jatyr.
Forým aıasynda «Atameken» ulttyq kásipkerler palatasy men AQSh Saýda palatasy arasynda strategııalyq áriptestik týraly memorandýmǵa qol qoıylady.
Aıta keteıik, buǵan deıin Qazaqstan men AQSh sý tasqynynyń aldyn alý jónindegi baǵdarlamany qabyldaǵan edi.
