AQSh Qazaqstan bıznesin qoldaýǵa daıyn — Debora Robınson
ASTANA. KAZINFORM — Astanada Qazaqstan men AQSh bıznesi jańa birlesken jobalardy talqylap jatyr. AQSh tarapy amerıkalyq naryqqa shyǵýdy kózdegen qazaqstandyq kompanııalarǵa qoldaý kórsetýge daıyn ekenin jetkizdi.
Astanada ótip jatqan «Qazaqstan–Amerıka» iskerlik dóńgelek ústelinde Debora Robınson buǵan deıingi bıznes-mıssııalarda jasalǵan kelisimder endi naqty jobalarǵa ulasyp jatqanyn aıtty.
— Buǵan deıingi bıznes-mıssııalarda qol jetkizilgen kelisimder búginde naqty jobalarǵa jáne kompanııalar arasyndaǵy jańa seriktestikke aınalyp jatyr. Bul bizdiń ekonomıkalyq baılanystarymyzdyń turaqty damyp kele jatqanyn kórsetedi, — dedi Debora Robınson.
Onyń málimetinshe, ótken jyly Qazaqstan men AQSh arasyndaǵy taýar aınalymy rekordtyq 5 mlrd dollarǵa jetken. Bul 2020 jylmen salystyrǵanda 3,5 mlrd dollarǵa kóp.
— Bul sandardyń máni zor. Olar jańa jumys oryndarynyń ashylýyna, tehnologııalardyń damýyna jáne eki el arasyndaǵy senimniń nyǵaıýyna yqpal etedi. Qazaqstandyq kompanııalar AQSh naryǵyna kóbirek qyzyǵýshylyq tanytyp otyr. Biz sol naryqqa shyǵýdy josparlaǵan nemese ondaǵy jumysyn keńeıtkisi keletin bızneske qoldaý kórsetýge daıynbyz, — dedi ol.
Debora Robınsonnyń sózinshe, eki el aldaǵy ýaqytta energetıka, tsıfrlyq ekonomıka, jasandy ıntellekt, kólik-logıstıka jáne strategııalyq jetkizý tizbekterin damytý baǵyttaryndaǵy yntymaqtastyqty jalǵastyrady.
Aıta keteıik, buǵan deıin Qazaqstan men AQSh bıznesi jańa seriktestikke qadam basyp jatqanyn jazdyq.
