AQSh-Qazaqstan áýe reısi: Air Astana Londonǵa bir qonyp qatynaıtyn marshrýtty pysyqtap jatyr

ASTANA. KAZINFORM — Kólik mınıstri Nurlan Saýranbaev Úkimet otyrysynan keıin ótken baspasóz máslıhatynda AQSh-Qazaqstan tikeleı áýe reısi áýeli London arqyly uıymdastyrylatynyn málim etti.

— Ondaı mindet moınymyzda bar. Bul reıs Soltústik polıýs arqyly ótedi. Basqasha aıtsaq, Reseı Federatsııasynyń aýmaǵy arqyly ushyp ótýimiz kerek. Ony eńserý úshin Dreamliner tıpindegi ushaq kerek. Sonda birinshi másele ondaı ushaqtyń joqtyǵynda bolyp otyr. Ondaı ushaq satyp alý merzimi shegerilip kele jatyr. Qazir Airbus pen Boeing-tiń tapsyrys portfeli 14 jylǵa júktelgen. Tipti kezek keri jyljyp barady. 2026 jyly biz alý kerek bolǵan ushaqtar 2027 jylǵa qalyp otyr, — dedi ol.

Mınıstr atalǵan alyp ushaq qolǵa tıgenshe AQSh-qa tikeleı ushý múmkin emestigin atap ótti.

— Qazir Air Astana AQSh-qa London arqyly qatynaýdy usynyp otyr. Londonǵa bir qonyp, sol bıletpen sapardy ári qaraı jalǵastyrady. Dreamliner tıpindegi ushaq qolǵa tıgenshe osylaı amaldaý josparlanyp otyr. Qazir osyndaı marshrýt pysyqtalyp jatyr, — dedi Nurlan Saýranbaev.

Sondaı-aq, ol «Qazaqstan temir joly» ulttyq kompanııasy men amerıkalyq Wabtec kompanııasy arasyndaǵy 4,2 mlrd dollarlyq kelisimshart týraly pikir bildirdi.