AQSh Qatar men Bahreındegi áskerı bazalarynan qyzmetkerlerin evakýatsııalady

ASTANA. KAZINFORM – AQSh Qatar men Bahreındegi áskerı bazalarynan júzdegen áskerı qyzmetkerin evakýatsııalady. Bul sheshim Iranǵa yqtımal soqqy jasaý qaýpine baılanysty qabyldanǵan, dep habarlaıdy Sınhýa.

The New York Times basylymynyń Pentagon ókilderine silteme jasap jazýynsha, evakýatsııa Qatardaǵy «Ál-Ýdeıd» áýe bazasynda jáne Bahreındegi AQSh-tyń birneshe áskerı nysanynda júrgizilgen.

Bahreınde AQSh Áskerı-teńiz kúshteriniń Besinshi floty ornalasqan.

Buǵan deıin AQSh prezıdenti Donald Tramp Irandy ıadrolyq kelisimge kelýge májbúrleý maqsatynda shekteýli áskerı soqqy jasaý múmkindigin qarastyryp otyrǵanyn málimdegen.

Óz kezeginde Irannyń syrtqy ister mınıstri Abbas Arakchı Tegeran men Vashıngton arasyndaǵy yqtımal ıadrolyq kelisim jobasy aldaǵy eki-úsh kún ishinde daıyn bolatynyn aıtty. Onyń sózinshe, budan keıin taraptarǵa kelissózderdiń taǵy bir kezeńin ótkizý qajet bolýy múmkin.

Donald Tramp buǵan deıin Iran 10-15 kún ishinde ıadrolyq baǵdarlama boıynsha «mańyzdy» kelisim jasamasa, «óte aýyr saldarǵa» tap bolatynyn eskertken.

Sonymen qatar Irannyń BUU janyndaǵy turaqty ókildigi Birikken Ulttar Uıymy Bas hatshysy Antonıý Gýterrıshke jáne Qaýipsizdik keńesiniń tóraǵasyna hat joldap, AQSh tarapynan áskerı agressııa jasalǵan jaǵdaıda «batyl ári barabar jaýap» berýge daıyn ekenin málimdegen.