AQSh Qarjy mınıstrligi: Venesýelaǵa qarsy engizilgen sanktsııalar jumsartylady

ASTANA. KAZINFORM – AQSh Qarjy mınıstri Skott Bessent Vashıngtonnyń Venesýelaǵa qatysty engizgen birqatar sanktsııalary aldaǵy aptada jeńildetilýi múmkin ekenin málimdedi. Bul qadam munaı satýdy jeńildetýge baǵyttalǵan, dep habarlaıdy DW.

Reuters agenttiginiń habarlaýynsha, mınıstr kelesi aptada Halyqaralyq valıýta qory (HVQ) men Dúnıejúzilik bank basshylyǵymen kezdesip, Venesýelamen yntymaqtastyqty qaıta jandandyrý máselesin talqylaýdy josparlap otyr.

Skott Bessentiń aıtýynsha, qazirgi ýaqytta HVQ shottarynda arnaıy qaryz alý quqyqtary (SDR) túrinde buǵattalǵan Venesýelanyń shamamen 5 mlrd dollar (4,3 mlrd eýro) kólemindegi qarjylyq aktıvteri el ekonomıkasyn qalpyna keltirý úshin paıdalanylýy múmkin. Onyń sózinshe, AQSh Qarjy mınıstrligi bul qarajatty Venesýelany qaıta qalpyna keltirý maqsatynda dollarǵa aıyrbastaýǵa daıyn.

– Biz satylatyn munaıǵa qatysty sanktsııalardy alyp tastap jatyrmyz, – dedi AQSh Qarjy mınıstri.

Sonymen qatar AQSh Qarjy mınıstrligi negizinen tankerlerde saqtalyp turǵan munaı saýdasynan túsken kiristi Venesýelaǵa aýdarýdy jeńildetetin tetikterdi qarastyryp jatyr. Bessent sondaı-aq shaǵyn jeke kompanııalar Venesýelanyń munaı sektoryna qysqa merzimde qaıta oralýy múmkin degen pikir bildirdi.

Aıta keteıik, buǵan deıin AQSh prezıdenti Donald Tramp Venesýela aldaǵy ýaqytta tek amerıkalyq taýarlardy satyp alatynyn málimdegen bolatyn.