AQSh Qarjy mınıstri Ormýz buǵazy aldaǵy eki kúnde ashylýy múmkin ekenin málimdedi
ASTANA. KAZINFORM — Vashıngton Iranmen Ormýz buǵazy arqyly keme qatynasyn qaıta jandandyrý máselesi boıynsha kelissózderde ilgerileýshilik bar ekenin habarlady, dep habarlaıdy Kazinform tilshisi.
AQSh Qarjy mınıstri Skott Bessenttiń aıtýynsha, Vashıngton men Tegeran seısenbi nemese sársenbi kúnderi Ormýz buǵazy arqyly erkin keme qatynasyn qalpyna keltirý týraly kelisimge kelýi múmkin.
— Biz ırandyqtarmen kelissóz júrgizip jatyrmyz. Búgin nemese erteń buǵazdy ashý týraly kelisimge qol jetkizip, osy qaqtyǵys jaǵdaıyn qalypty arnaǵa jaqyndatýǵa múmkindik bar, — dedi Bessent CNBC telearnasyna bergen suhbatynda.
Bessent says there may be deal Tuesday or Wednesday to open Strait of Hormuz with 'freedom of movement' https://t.co/va7Za2N7fN
— CNBC (@CNBC) August 4, 2026
Onyń sózinshe, yqtımal kelisim kommertsııalyq kemeler úshin erkin júzý múmkindigin qarastyrýy tıis. Irannyń buǵaz arqyly ótý úshin aqy alýy múmkin be degen suraqqa mınıstr negizgi másele navıgatsııa erkindigine qatysty ekenin atap ótti.
Keıin AQSh Memlekettik hatshysy Marko Rýbıo Iran jáne Omanmen júrgizilip jatqan kelissózderde ilgerileý bar ekenin rastady. Alaıda taraptar ázirge túpkilikti kelisimge kelgen joq.
— Bul kelissózderde alǵa jyljý bar, biraq sońǵy nátıje áli joq. Biz oǵan jaqyn arada qol jetkizemiz dep úmittenemiz, — dedi Rýbıo jýrnalısterge.
Sonymen qatar Katar Syrtqy ister mınıstrliginiń resmı ókili Majıd ál-Ansarı deldaldyq jumystar jalǵasyp jatqanyn málimdedi. Onyń aıtýynsha, taraptar shıelenisti azaıtýǵa, Ormýz buǵazy arqyly keme qatynasyn qalpyna keltirýge jáne dıplomatııalyq úderiske qaıta oralýǵa basymdyq berip otyr.
Buǵan deıin AQSh prezıdenti Donald Tramp Iranmen kelissózderdiń qaıta bastalǵanyn habarlaǵan edi.
Alaıda Iran Syrtqy ister mınıstrliginiń resmı ókili Ismaıl Baǵaı buǵan deıin Vashıngtonmen kelissózder júrgizilip jatqanyn joqqa shyǵarǵan. Onyń aıtýynsha, Tegeran Ormýz buǵazyndaǵy keme qatynasyn qalpyna keltirý máselesi boıynsha tek Omanmen konsýltatsııalar ótkizip jatyr.
