AQSh Qarjy mınıstri Nvidia kompanııasyna jańa basshyny syrttan izdeýdi usyndy
ASTANA. KAZINFORM — AQSh Qarjy mınıstri Skott Bessent amerıkalyq tehnologııalyq Nvidia kompanııasyna jańa bas dırektordy óz qyzmetkerleriniń arasynan emes, syrttan izdeýge keńes berdi, dep habarlaıdy Anadoly.
Buǵan kompanııanyń negizin qalaýshy Djensen Hýangtyń ótken aptada qyzmetinen ketýi sebep bolǵan.
— Bul jaǵdaı dırektorlar keńesi jańa basshyny izdeý barysynda syrttan úmitkerlerge nazar aýdarýy kerek degen oıǵa jeteleıdi. Kompanııa ishinde bolǵan jaıttardy eskersek, eleýli ózgerister qajet, — dedi Bessent Fox News telearnasyna bergen suhbatynda.
Buǵan deıin AQSh prezıdenti Donald Tramp Nvidia basshysy qyzmetine Apple kompanııasy dırektorlar keńesiniń atqarýshy tóraǵasy Tım Kýktyń kandıdatýrasyn usynǵan bolatyn. Bul usynys Djensen Hýang qyzmetinen ketkennen keıin aıtyldy.
Bessent Hýangtyń jańashyl maman retindegi eńbegin joǵary baǵalaı otyryp, kompanııanyń tehnologııalyq kóshbasshylyǵy ony baqylaý talaptaryn buzǵany úshin jaýapkershilikten bosatpaıtynyn atap ótti.
Mınıstrdiń aıtýynsha, AQSh-tyń Ulttyq bankter qyzmetin qadaǵalaıtyn Valıýta baqylaýshysy basqarmasynyń (OCC) federaldyq retteýshileri qarjy uıymdarynda osyndaı zańbuzýshylyqtar bolǵan jaǵdaıda olardyń basshylaryn dereý qyzmetinen shetteter edi.
Sondaı-aq Bessent Nvidia kompanııasynyń Sıngapýrdaǵy deldal kompanııalardy paıdalanýyna qatysty eskertý belgilerin ne sebepti elemegenine kúmán keltirdi.
Onyń sózinshe, Qytaıda ónim satýdan túsetin tabys azaıyp, Sıngapýrdaǵy satylym kúrt óskennen keıin kompanııa keıbir óńirler boıynsha satý kórsetkishterin jarııalaýdy toqtatqan. Al mınıstr keltirgen málimetterge sáıkes, Sıngapýrda satylǵan chıpterdiń nebári 1 paıyzy ǵana qalǵan.
— Meniń oıymsha, bizge jańa zańnamalyq normalar qajet emes. Qoldanystaǵy erejelerdiń bári bar. Tek olardyń oryndalýyn qamtamasyz etý kerek, — dedi mınıstr.
12 qarashada Djensen Hýang ózi 30 jyldan astam ýaqyt basqarǵan Nvidia kompanııasynyń basshysy qyzmetinen ketti. Sondaı-aq ol Sıngapýrdaǵy Megaspeed bultty tehnologııalar kompanııasynyń burynǵy bas dırektory Alısa Hýangpen nekeden tys qarym-qatynasta bolǵanyn moıyndady. Buǵan deıin BAQ-ta Alısa Hýang Qytaı barlaý qyzmetiniń yqtımal agenti bolýy múmkin degen boljamdar jarııalanǵan.
Bessent tyńshylyq týraly boljamdardy «jala jabýǵa negizdelgen oıdan shyǵarylǵan áńgime» dep joqqa shyǵardy. Onyń aıtýynsha, basty alańdaýshylyǵy — Nvidia kompanııasyndaǵy korporatıvtik mádenıet tabysty jasandy túrde arttyrý úshin «zańsyz bolýy múmkin satylymdardy» yntalandyrǵan bolýy yqtımal.
Mınıstr Nvidia dırektorlar keńesi men syrtqy zań keńesshilerinen týyndaǵan suraqtarǵa 10 kún ishinde jaýap berýdi talap etti.
Buǵan deıin AQSh Ádilet mınıstrligi Nvidia kompanııasyna qatysty úsh tergeý júrgizip jatqany belgili boldy.