AQSh kanadalyq ımportqa 100% baj salyǵyn engizýi múmkin

ASTANA. KAZINFORM — AQSh prezıdenti Donald Tramp Kanada Qytaımen saýda kelisimin jasasa, odan keletin taýarlarǵa 100 paıyzdyq baj salyǵyn engizemiz dep qorqytty, dep habarlaıdy CBS News.

Ol bul týraly Truth Social áleýmettik jelisinde Kanadanyń premer-mınıstri Mark Karnı Kanadany AQSh-qa baǵyttalǵan qytaılyq taýarlar úshin «tasymaldaý pýnktine» aınaldyra alamyn dep oılasa, «qatty qatelesedi» dep jazdy.

— Eger Kanada Qytaımen kelisimge qol qoısa, Amerıka Qurama Shtattaryna kiretin barlyq kanadalyq taýarlarǵa dereý 100 paıyzdyq baj salyǵy salynady, — dedi Tramp.

Jaǵdaı áli kúnge jalǵasyp jatqan saýda shıelenisi aıasynda údeı tústi: Kanada aýylsharýashylyq ónimderine ımporttyq tarıfterdiń tómendeýine aıyrbas retinde Qytaıdyń elektr kólikterine tarıfterdi tómendetý týraly kelisimge qol qoıdy. Tramp bastapqyda kelisimdi «jaqsy qadam» dep atap, «Karnı durys áreket jasady» dep eseptegen bolatyn.

Degenmen, AQSh prezıdentiniń qoqan-loqqylary onyń Karnımen jeke janjalynyń kúsheıýimen sáıkes keldi. Davosta Tramp «Kanada AQSh-tyń arqasynda ómir súrip jatyr» dep málimdegen edi, oǵan Kanada basshysy onyń eli óziniń táýelsizdigin álemge pash etip jatyr jáne «avtorıtarlyq yqpalǵa boı aldyrýǵa beıim emes» dep jaýap berdi.

Esterińizge sala keteıik, Tramp Karnıdiń jańadan qurylǵan prezıdenttik Beıbitshilik keńesine qosylýǵa shaqyrýyn qaıtaryp alyp, ony áleýmettik jelide «Kanadanyń eń bedeldi shaqyrýyn qaıtaryp alý» dep sıpattady.

Elder arasyndaǵy shıelenis Tramptyń "Kanadany AQSh-qa qosý" týraly birneshe ret aıtqan usynysynyń, sondaı-aq Kanada, Grenlandııa, Venesýela jáne Kýba AQSh-tyń bir bóligi retinde usynylǵan kartany ázil-qaljyńmen óńdeýiniń aıasynda kúsheıe tústi.

Qazirgi ýaqytta Kanada men AQSh Tramp engizgen birqatar tarıfterdi tómendetý týraly kelisimge qol jetkizgen joq.

Eske salaıyq, Qytaı byltyr kanadalyq taýarlarǵa qosymsha baj salyǵyn engizgen bolatyn.