AQSh Kanadadan alkogol ónimderin ımporttaýǵa tyıym salady
ASTANA. KAZINFORM — AQSh Kanadadan alkogol ónimderi men birqatar taýarlardy ımporttaýǵa tyıym salyp, basqa kanadalyq ónimderge baj salyǵyn arttyrady, dep habarlaıdy Euronews.
AQSh prezıdenti Donald Tramp 8 qyrkúıek keshke birqatar jarlyqqa qol qoıdy. Aq úıdiń málimetinshe, bul sheshim Kanadanyń amerıkalyq taýarlarǵa jańa baj salyǵyn engizýine jaýap retinde qabyldanǵan.
Tramptyń jarlyqtaryna sáıkes, 15 qyrkúıekten bastap Kanadadan ımporttalatyn matrastar, motorly qaıyqtar men golf-karlarǵa jáne birqatar basqa taýarǵa 50 paıyzdyq qosymsha baj salyǵy salynady.
Al Kanadadan alkogol ónimderiniń ártúrli túrlerin, sondaı-aq sarysý sekildi sút ónimderin ımporttaýǵa tyıym salý 29 qyrkúıekten bastap kúshine enedi.
Eske sala keteıik, 8 qyrkúıekte Kanadanyń amerıkalyq taýarlarǵa qatysty jaýap baj salyǵy kúshine endi. Bul Ottava men Vashıngton arasyndaǵy saýda shıelenisin odan ári kúsheıtti.
Kanadanyń jańa tarıfteri jalpy quny 20 mlrd dollar bolatyn AQSh taýarlaryn qamtıdy. Baj mólsheri 15 paıyzdan 50 paıyzǵa deıin belgilengen.
Jańa tarıfterge AQSh-tan jetkiziletin bolat, alıýmınıı, irimshik, turmystyq tehnıka, kıim-keshek, kosmetıka jáne aýyl sharýashylyǵy tehnıkasy sekildi taýarlardyń keń aýqymy endi.
Buǵan deıin, tamyz aıynyń sońynda Donald Tramp AQSh pen Kanada shekarasyndaǵy Ontarıo kóliniń ataýyn «Amerıka kóli» dep ózgertý týraly jarlyqqa qol qoıǵan bolatyn.
Bul sheshim Vashıngton men Ottava arasyndaǵy saýda soǵysy jaǵdaıynda qabyldandy.
