AQSh kámeletke tolmaǵandardyń jynysyn aýystyrýyn qarjylandyrmaıdy

ASTANA. KAZINFORM – AQSh prezıdenti Donald Tramp 19 jasqa tolmaǵan azamattardyń bir jynystan ekinshi jynysqa aýysýyn federaldyq qoldaýdy toqtatýǵa baǵyttalǵan jarlyqqa qol qoıdy, dep habarlaıdy Global News.

– Amerıka Qurama Shtattarynyń saıasaty balanyń bir jynystan ekinshi jynysqa aýysýyn, destrýktıvti jáne ómirdi ózgertetin protsedýralardy qarjylandyrmaıdy, demeýshilik kórsetpeıdi, kómektespeıdi nemese qoldamaıdy jáne tyıym salatyn nemese shekteıtin barlyq zańdardy qatań túrde oryndaıdy, – dedi Tramp málimdemesinde.

Bul – Tramptyń Baıden ákimshiliginiń transgenderlerdi qorǵaıtyn saıasatyn keri qaıtarýǵa baǵyttalǵan sońǵy áreketi. Dúısenbide Tramp Pentagonǵa transgenderlerdi áskerı qyzmetten shettetýge baǵyttalǵan tekserý júrgizýdi buıyrdy.

Tramp sondaı-aq jynysty tek er nemese áıel retinde tanıtyn buıryqqa qol qoıdy. Bul qazirdiń ózinde Memlekettik departamenttiń «H» genderlik belgisi bar tólqujattardy berýdi toqtatýyna ákeldi.

– Sońǵy aptadaǵy buıryqtarmen qatar bul buıryq ta osy eldegi adamdardy qorǵaýǵa emes, kerisinshe barlyq jastaǵy transgenderlerdi qoǵamnan shettetýge arnalǵany anyq, – dedi Amerıkalyq Azamattyq bostandyqtar odaǵynyń LGBTK jáne AITV jobasynyń zańgeri Harper Seldın.

Sondaı-aq, elde transgenderlerdiń áıelder men qyzdar arasyndaǵy sportqa qatysýyna jol bermeý jáne transgenderlerdiń, ásirese mektepterde qaı ájethanany paıdalana alatynyn belgileý úshin Respýblıkalyq partııa baqylaýyndaǵy shtattarda túrli qadamdar jasalyp jatyr.

Buǵan deıin AQSh Kongresiniń Ókilder palatasy transseksýal stýdent-sportshylardyń áıelder sportyna qatysýyna tyıym salatyn zań jobasyn qabyldaǵany habarlanǵan bolatyn.