AQSh: Kalıfornııa halqynyń 90 paıyzyna sý basý qaýpi tónip tur
ASTANA. QazAqparat - Kalıfornııanyń 35 mıllıonǵa jýyq turǵyny nemese halqynyń 90 paıyzyna sý basý qaýpi tónip tur, dep habarlaıdy QazAqparat «Golos Amerıkı» agenttigine silteme jasap.
Kalıfornııaǵa kúshti daýyl jaqyndaýyna baılanysty sheneýnikter jaǵalaýdaǵy qaýipti aımaq turǵyndaryn evakýatsııalaýǵa buıryq berdi. 2018 jyly munda kóshkin saldarynan 23 adam qaza tapqan edi.
Gýbernator Gevın Nıýsom tótenshe jaǵdaı jarııalady. Onyń aıtýynsha, bul tabıǵı apatqa daıyndalý jáne saldaryn joıýǵa kómektesýi tıis. Shamamen 35 mln adam nemese Kalıfornııa halqynyń 90%-yna sý tasqyny qaýpi tónip tur.
Qazirgi kezde 180 myńǵa jýyq úı men kásiporyn jaryqsyz qaldy.
Jańbyr saldarynan San-Frantsısko halyqaralyq áýejaıynda 60-tan astam reıst toqtatyldy.
AQSh-tyń keıbir shtattary boranmen kúresýde. Buǵan deıin AQSh pen Kanadada qarly boran saldarynan 56 adamnyń qaza tapqany habarlanǵan bolatyn.
Foto: Fred Grıvz | Reıter
