AQSh-qa tikeleı reıs jaqyndady: Qazaqstan avıatorlary Nıý-Iorkte oqýda júr
ASTANA. KAZINFORM — Otandyq avıatsııa mamandary Nıý-Iorktiń eń iri áýejaıynda halyqaralyq júk tasymalynyń qaýipsizdik erejelerin meńgerip qaıtty. Qazaqstannyń Kólik mınıstrligi men AQSh-tyń Astanadaǵy elshiligi birlesip, Astana jáne Almaty áýejaılarynyń qyzmetkerleri men avıatsııa salasynyń ókilderi úshin Djon Kennedı atyndaǵy áýejaıda arnaıy (IACIT) trenıngin uıymdastyrdy.
Іs-shara AQSh Keden jáne shekara qyzmetiniń terrorızmge qarsy tobynyń qoldaýymen ótti.
Oqý barysynda mamandar júk tasymalynyń táýekelderin taldaý, áýe kemeleri men júkterdi tekserýdi uıymdastyrý, baqylaýdyń tehnıkalyq quraldaryn qoldaný, kınologııalyq bólimshelerdińjumysy jáne vedomstvoaralyq ózara is-qımyl tetikteriniń zamanaýı tásilderimen tanysty.
Avıatsııalyq qaýipsizdik pen Kedendik baqylaý rásimderin ıntegratsııalaý, sonymen qatar halyqaralyq júk tasymaldarynyń qaýipsizdigin qamtamasyz etý kezinde táýekelge baǵdarlanǵan tásildi qoldaný salasynda da egjeı-tegjeıli tájirıbe almasý ótti.
Baǵdarlamaǵa qatysý Qazaqstan men AQSh arasynda tikeleı áýe qatynasyn ashýǵa daıyndyq, sondaı-aq avıatsııalyq qaýipsizdik salasyndaǵy amerıkalyq seriktestermen yntymaqtastyqty damytý turǵysynan mańyzdy.
Alynǵan tájirıbe avıatsııalyq qaýipsizdik sharalaryn odan ári jetildirý jáne otandyq avıatsııalyq uıymdardyń qyzmetine ozyq halyqaralyq tájirıbelerdi engizý úshin paıdalanylatyn bolady.
Eske sala keteıik, buǵan deıin Qazaqstanda Avıatsııalyq ǵylymı-zertteý ınstıtýty qurylatynyn jazǵanbyz.
