AQSh-qa oqýǵa ketken almatylyq páterinen aıyrylyp qala jazdady
ALMATY. QazAqparat - Almatyda Amerıkaǵa oqýǵa ketken turǵynnyń páteri jalǵan senimhatpen satylyp ketken. Qylmystyq is Bostandyq aýdandyq sotynda qaraldy, dep habarlaıdy QazAqparat tilshisi.
Qalalyq sot taratqan habarlamaǵa qaraǵanda, 3 alaıaq 4 bólmeli páterdi parkıngimen qosa satyp jibergen. Olarǵa qatysty qylmystyq is qozǵaldy. Sotqa shaǵymdanǵan páter ıesi baspanasynyń satylyp ketkenin kezdeısoq bilip qalǵan.
«Aryzdanýshy 2017 jyldyń 16 qyrkúıeginde jasalǵan páterdi satý týraly kelisimshartty zańsyz dep tanýdy surady. Ol aryzynda Almaty qalasy «Mıras» yqshamaýdanynda ornalasqan jer asty parkıngi bar 4 bólmeli páterdi ózine tıesili ekenin dáleldep, Qyrǵyz Respýblıkasy Bishkek qalasyndaǵy notarıýsta ázirlengen senimhatty zańsyz dep tanýdy surady», -delingen habarlamada.
Sot aryzdanýshynyń senimhat pen kelisimshartty zańsyz dep taný týraly aryzyn qanaǵattandyrdy.
Aıta keteıik, aryzdanýshy 2017 jyldyń qańtar aıynan beri AQSh-ta bilim alyp jatyr.
