AQSh-qa lańkestik shabýyldar jasalýy múmkin - OBB dırektory

ASTANA. QazAqparat - «Islam memleketi» (IM) lańkestik tobynyń sodyrlary Qurama Shtattardyń aýmaǵynda jańa lańkestik áreketterdi uıymdastyrýǵa árekettenýi múmkin. Bul jóninde dúısenbi, 15 aqpan kúni CBS telearnasyna bergen suhbatynda AQSh-taǵy Ortalyq barlaý basqarmasynyń dırektory Djon Brennan málimdedi, dep jazady Lenta.ru.

«Men olar munda ózderiniń adamdaryn, materıaldaryn jiberýge árekettenedi dep oılaımyn», - dep shamalady OBB-nyń basshysy. Budan basqa, lańkester AQSh aýmaǵynda jaldanǵan adamdarǵa senýi de múmkin.

«Olar mindetti túrde tabysqa jetedi dep oılamaımyn», - dedi Brennan. Lańkester Batys pen Musylman áleminiń arasynda janjal shyǵarýǵa árekettenip otyr, deıdi ol. Brennannyń pikirinshe, bul IM qataryna jańa jaqtastardy tartý maqsatymen jasalyp otyr.

OBB-nyń dırektory arnaıy qyzmetterdiń Eýropada lańkestik áreketterdiń jolyn keskenin habarlady. «Sózime senseńizder, qaýipsizdik jáne barlaý qyzmetteri kóptegen shabýyldardyń aldyn alǵan», - dedi ol. Bul rette oryndaýshy kúdiktiler de ustaldy, Brennannyń aıtýynsha, olar «Iraktan Sırııaǵa, odan Eýropaǵa keıin ótken».