AQSh-qa eksporttalatyn qazaqstandyq ónimniń 95%-y jańa bajdarǵa jatpaıdy
ASTANA. KAZINFORM – AQSh ákimshiligi engizgen jańa kedendik bajdardyń Qazaqstan eksportyna áseri shekteýli bolady. Bul týraly Úkimettegi brıfıng barysynda jýrnalısterdiń suraǵyna jaýap bergen QR Saýda jáne ıntegratsııa mınıstri Arman Shaqqalıev málim etti.
Mınıstrdiń aıtýynsha, qazirgi ýaqytta AQSh-tyń jańa bajdary Qazaqstannan eksporttalatyn ónimderdiń shamamen 5%-yna ǵana qatysty. Al eksporttyń basym bóligi – 95%-y bul shekteýlerge kirmeıdi.
– Búgingi tańda biz resmı baspasóz habarlamasynda aıtqanymyzdaı, bajdar áser etken eksport kólemi jalpy ónimniń shamamen 5%-yn quraıdy. AQSh ákimshiligi engizgen baj mólsheri 12,5%. Fızıkalyq kólem boıynsha naqty kórsetkish taýar pozıtsııasyna baılanysty ózgerip otyrady. Degenmen, jalpy alǵanda, AQSh-qa baǵyttalatyn ónimderdiń 95%-y bul bajdarǵa jatpaıdy. Shamamen 5%-y ǵana qamtylady, – dedi Arman Shaqqalıev.
Onyń aıtýynsha, Qazaqstan tarapy jaǵdaıdy turaqty baqylaýda ustap, qajetti jaǵdaıda tıisti sharalar qabyldaıdy.
– Biz únemi kelissózder júrgizý protsesindemiz, jaǵdaıdy baqylap otyramyz. Qajet bolǵan jaǵdaıda dıplomatııalyq arnalar arqyly da, AQSh Saýda ókildigimen ózara is-qımyl aıasynda da bul máseleni baqylaýda ustaımyz, – dedi mınıstr.
Aıta keteıik, Saýda mınıstrligi AQSh-tyń qosymsha kedendik baj engizýine qatysty túsinik berdi.
