AQSh Irannyń ıadrolyq nysandaryna soqqy jasady — Tramp operatsııany sátti dep atady
ASTANA. KAZINFORM – AQSh prezıdenti Donald Tramp Irannyń ıadrolyq ınfraqurylymyna qarsy júrgizilgen «óte sátti» áskerı operatsııa týraly málimdedi, dep habarlady Kazinform agenttiginiń menshikti tilshisi.
Amerıkalyq ÁÁK (áskerı-áýe kúshteri) Iran ıadrolyq baǵdarlamasynyń úsh negizgi nysanyna – Fordo, Natanz jáne Isfahanǵa soqqy jasaǵan. Tramptyń aıtýynsha, negizgi nysana retinde taý astynda tereń ornalasqan Fordo kesheni tańdalǵan.
— Tolyq oq-dári qory negizgi nysana — Fordoǵa tastaldy, — dep jazdy Aq úı basshysy Truth Social jelisindegi paraqshasynda.
«Barlyq ushaqtar Iran áýe keńistigin tastap shyǵyp, sátti túrde óz bazalaryna qaıtyp bara jatyr. Amerıkalyq uly jaýyngerlerimizdi quttyqtaımyn. Mundaı operatsııany álemde eshbir armııa oryndaı almas edi. Endi beıbitshilik ýaqyty keldi», — delingen jazabada.
Tramp Aq úıden arnaıy teleúndeý jasaıtynyn jarııalady, ol jergilikti ýaqytpen saǵat 22:00-de (Vashıngton ýaqyty) efırge shyǵýy tıis.
Truth Social-daǵy jazbasynda ol bylaı dep qosty:
— Bul – AQSh, Izraıl jáne búkil álem úshin tarıhı sát. Iran endi bul soǵysty toqtatýǵa kelisýi kerek.
Reuters agenttiginiń derekterine súıensek, operatsııaǵa B-2 Spirit strategııalyq bombalaýshy ushaqtary qatysqan. Olar jer astyndaǵy nyǵaıtylǵan nysandardy joıýǵa arnalǵan óte qýatty bombalardy tasymaldaı alady. Shabýylǵa deıin birneshe saǵat buryn olardyń baǵyty ashyq derekkózder arqyly baqylanǵan – ushaqtar AQSh-tan Gýam aralyndaǵy bazaǵa qaraı ushqan.
Axios basylymy joǵary laýazymdy ızraıldik derekkózge silteme jasap, Izraıl AQSh-tyń soqqysy týraly aldyn ala habardar bolǵanyn jazdy. Alaıda Izraıl ÁÁK bul operatsııaǵa qatysqany resmı túrde rastalǵan joq. Vashıngtondaǵy derekkózderdiń aıtýynsha, bul avıatsııalyq shabýyl Izraıl men Iran arasyndaǵy bir aptadan astam ýaqyt boıy jalǵasyp jatqan áskerı qaqtyǵystyń aýqymyn edáýir keńeıtip otyr.
Tramp óz sózinde taǵy da atap ótti:
«Fordo joıyldy».
Fordo kesheni Irannyń ıadrolyq baǵdarlamasyndaǵy eń qorǵalǵan nysan sanalady. Onyń joıylýy óńirdegi áskerı ári dıplomatııalyq teketireste betburys kezeńi bolýy múmkin.
Aıta keteıik, Izraıl buǵan deıin óz áskerı naýqanynyń basty maqsaty retinde Irannyń ıadrolyq qarý jasaý múmkindigin tolyq joıýdy ataǵan bolatyn. Al Iran bıligi óz ıadrolyq baǵdarlamasynyń tek beıbit maqsatty kózdeıtinin aıtyp keledi.
Batys elderi tarapynan júrgizilgen dıplomatııalyq kelissózder ázirge nátıje bergen joq.
Aldaǵy saǵattarda Iran bıligi tarapynan resmı málimdeme jasalyp, shabýyldyń saıası jáne áskerı saldaryna qatysty naqty aqparattar jarııalanady dep kútilýde.
Sondaı-aq buǵan deıin Eýropa dıplomattarynyń Iran SІM basshysymen ótken kezdesýinen nátıje shyqpaǵany habarlanǵan edi.
Qosymsha aıta ketsek, Pákistan prezıdenti Donald Trampty 2026 jylǵy Nobel beıbitshilik syılyǵyna usynǵan.