AQSh Irannyń ıadrolyq baǵdarlamasy týraly aqparat úshin 20 mln dollar usyndy
ASTANA. KAZINFORM – AQSh Memlekettik departamenti Irannyń ıadrolyq baǵdarlamasy týraly aqparat bergenderge 20 mln dollarǵa deıin syıaqy jarııalady. Vashıngton ıadrolyq nysandar, jabdyqtar men mamandar týraly, sondaı-aq amerıkalyq soqqylardan keıin olardyń qaıda ornalasqany jóninde málimet alýǵa úmittenip otyr, dep habarlaıdy BILD basylymy.
AQSh tarapy ásirese ıadrolyq baǵdarlamaǵa qatysy bar ǵalymdar men basqa da qyzmetkerler, sondaı-aq jabdyqtardyń oryn aýystyrýy týraly aqparatqa qyzyǵýshylyq tanytyp otyr. Málimetterdi Signal shıfrlanǵan messendjeri nemese AQSh Memlekettik departamentiniń arnaıy anonımdi onlaın arnasy arqyly jiberýge bolady.
Aqshalaı syıaqymen qatar, qajet bolǵan jaǵdaıda aqparat berýshilerge basqa elge qonys aýdarýǵa kómektesýge ýáde etiledi. Bul usynys AQSh-tyń «Ádildik úshin syıaqy» (Rewards for Justice) baǵdarlamasy aıasynda júzege asyrylady.
AQSh Memlekettik departamenti bul bastamany Vashıngtonnyń Irannyń ıadrolyq baǵdarlamasynyń qazirgi jaǵdaıy týraly jetkilikti ári senimdi aqparatqa ıe emestigimen túsindiredi. MAGATE ınspektorlarynyń jumysyna qoıylǵan shekteýlerge baılanysty halyqaralyq agenttik Tegerannyń qyzmetin, sonyń ishinde ýran baıytýǵa arnalǵan jabdyqtardyń óndirisi men qoryn tolyq baqylaı almaı otyr.
AQSh vedomstvosynyń málimetinshe, Iran ýrandy 60 paıyzǵa deıin baıytqan. Al qarý jasaýǵa jaramdy ýran alý úshin ony ádette shamamen 90 paıyzǵa deıin baıytý qajet. Sarapshylardyń boljamynsha, eldegi qolda bar qordy odan ári baıytqan jaǵdaıda birneshe ıadrolyq oqtumsyq jasaýǵa jetýi múmkin.
Aıta keteıik, buǵan deıin MAGATE Irannan qarý jasaý deńgeıine jaqyn baıytylǵan ýran qory týraly naqty málimet berýdi talap etken edi. Ol kezde agenttik ınspektorlary bes aıdan astam ýaqyt boıy bul qordy teksere almaǵan.
Al Irannyń Syrtqy ister mınıstri Abbas Arakchı ýran qorynyń basym bóligi áýe soqqylary saldarynan qıraǵan ıadrolyq nysandardyń astynda qalǵanyn málimdegen edi.
