AQSh Irannyń ýranyn basyp alý úshin arnaıy operatsııa júrgizýdi qarastyryp jatyr
ASTANA. KAZINFORM — AQSh prezıdenti Donald Tramp qarý jasaýǵa jaramdy ıran ýranyn basyp alý úshin arnaıy maqsattaǵy kúshterdi ornalastyrý múmkindigin qarastyryp jatyr. Sebebi resmı tulǵalar ýran qory basqa jerge kóshirilip áketken bolýy múmkin degen alańdaýshylyq bildirgen. Bul týraly Bloomberg jazdy.
Boljam boıynsha, Iranda qarý jasaý deńgeıine óte jaqyn dárejede baıytylǵan shamamen 441 kılogramm ýran bar. Bul mólsher shamamen 11 ıadrolyq bomba jasaýǵa jetkilikti. Sonymen qatar elde baıytylý deńgeıi tómen 8000 kılogramnan astam ýran bar, ony qosymsha óńdeý arqyly odan ári baıytýǵa bolady.
Sheneýnikterdiń aıtýynsha, belgisizdik arta túsken, óıtkeni BUU ınspektorlary shamamen toǵyz aı boıy bul materıaldyń naqty qaı jerde ornalasqanyn teksermegen.
AQSh pen Izraıldiń resmı ókilderi joǵary deńgeıde baıytylǵan zatty belsendi túrde izdestire bastady jáne onyń ornalasqan jeri anyqtalǵan jaǵdaıda áreket etý josparlaryn ázirlegen. Bul jospardyń ishinde qajet bolǵan jaǵdaıda, arnaıy maqsattaǵy kúshterdi ornalastyrý máselesi de bar.
Eske sala ketsek, buǵan deıin Iran eshbir memleket ózderin ýran baıytý quqyǵynan aıyra almaıtynyn málimdedi.
