AQSh Irannyń qarýly kúshterin qoldaıtyn qarjylyq jelige sanktsııa engizdi
ASTANA. KAZINFORM — AQSh Qarjy mınıstrligi Sheteldik aktıvterdi baqylaý basqarmasy (OFAC) arqyly Irannyń eki qarjylyq deldalyna jáne Gonkong pen Birikken Arab Ámirlikterinde tirkelgen onnan astam jeke jáne zańdy tulǵaǵa sanktsııa saldy, dep habarlaıdy AQSh Qarjy mınıstrligi.
Bul qurylymdar Syrtqy barlaý qyzmetiniń «Quds» kúshterine jáne Iran qarýly kúshteriniń Qorǵanys jáne materıaldyq-tehnıkalyq qamtamasyz etý mınıstrligine (MODAFL) munaı eksporty men ózge de qarjy túsimderin aýdarý jumystaryn úılestirgeni úshin aıyptalyp otyr.
Vedomstvonyń málimdeýinshe, «kóleńkeli» banktik jeliler halyqaralyq qarjy júıesin teris paıdalanyp, sanktsııalardy aınalyp ótý úshin sheteldik kompanııalar men krıptovalıýtany qoldanady. Túsken qarajat aımaqtyq terrorıstik toptardy qoldaýǵa jáne ballıstıkalyq zymyrandar men ushqyshsyz ushý apparattary sııaqty zamanaýı qarýlardy ázirleýge baǵyttalǵan.
Bul AQSh pen onyń odaqtastaryna qaýip tóndiredi.
— Irandyq qurylymdar sanktsııalardy aınalyp ótý úshin kóleńkeli banktik jelilerge súıenip, halyqaralyq qarjy júıesi arqyly mıllıondaǵan dollar aýdaryp otyr.
Prezıdent Donald Tramptyń basshylyǵymen biz Irannyń áskerı baǵdarlamalary men Taıaý Shyǵystaǵy turaqsyzdandyrý áreketterin qarjylandyratyn negizgi qarjylyq aǵymdardy buǵattaýdy jalǵastyramyz, — dedi AQSh Qarjy mınıstriniń terrorızmge qarsy is-qımyl jáne qarjylyq barlaý jónindegi orynbasary Djon K. Herlı.
Jańa sanktsııalar terrorızmge qarsy kúreske baǵyttalǵan №13224 prezıdent jarlyǵy aıasynda engizildi.
Bul — AQSh prezıdentiniń ulttyq qaýipsizdik týraly №2 memorandýmyna sáıkes qabyldanǵan «maksımaldy qysym» naýqany sheńberinde Irannyń kóleńkeli qarjylyq ınfraqurylymyna qarsy jasalǵan ekinshi shekteý sharasy.
Aıta keteıik, AQSh meksıkalyq Sinaloa karteliniń kóshbasshysy týraly aqparat úshin 5 mln dollar beredi.