AQSh Irannyń Hark aralyn basyp alý nemese ony qorshaý múmkindigin qarastyryp jatyr — Axios
ASTANA. KAZINFORM - Donald Tramp ákimshiligi Iranǵa qysym jasaý úshin Hark aralyn basyp alý nemese ony teńizden qorshaý josparlaryn talqylap jatyr. Maqsat — Ormýz buǵazy arqyly keme qatynasyn qaıta jandandyrý.
Bul týraly juma kúni derekkózderine silteme Axios basylymy jasap habarlady, dep jazady BBC. Hark araly arqyly Iran munaı eksportynyń shamamen 90 paıyzy ótedi.
Buǵan deıin AQSh aral aýmaǵyna soqqy jasaǵan. Ol kezde Donald Tramp munaı tasymalyna qatysty ınfraqurylym nysanaǵa alynbaǵanyn, soqqylar tek áskerı obektilerge baǵyttalǵanyn aıtqan. Iran tarapy da munaı ınfraqurylymyna zaqym kelmegenin málimdedi.
Alaıda Iran jaǵalaýynan 24 shaqyrym jerde ornalasqan araldy basyp alý operatsııasy amerıkalyq kúshterdi tikeleı qaýipke tigýi múmkin. Axios derekkózderiniń aıtýynsha, mundaı qadamǵa tek Ormýz buǵazy mańyndaǵy Irannyń áskerı áleýeti álsiregennen keıin ǵana barý josparlanyp otyr.
- Bizge shamamen bir aı kerek — soqqylar arqyly ırandyqtardy álsiretip, araldy basyp alyp, keıin ony kelissózderde qysym quraly retinde paıdalaný úshin, — deıdi Aq úı ustanymymen tanys derekkózderdiń biri.
Mundaı operatsııa maquldansa, AQSh óńirdegi ásker sanyn arttyrýy múmkin. Qazirdiń ózinde teńiz jaıaý áskeriniń úsh bólimshesi aımaqqa jiberilip jatyr. Sonymen qatar Aq úı men Pentagon qosymsha kúshterdi ornalastyrý múmkindigin qarastyryp otyr.
- AQSh ár prezıdent tusynda qaqtyǵystarǵa qurlyq áskerin tartqan. Bul taqyryptyń saıasılanyp ketkenin túsinemin, biraq prezıdent ózi durys dep sanaǵan sheshimdi qabyldaıdy, — deıdi taǵy bir derekkóz.
Sonymen birge Axios atap ótkendeı, Hark araly Irannyń munaı salasy úshin strategııalyq mańyzǵa ıe bolǵanymen, ony basyp alý Tegerandy Tramp usynǵan sharttarmen kelissózge májbúrleıdi degen naqty kepil joq.
AQSh Ormýz buǵazy men Hark aralyn baqylaýǵa alý úshin qurlyq áskerin kúsheıtpek.
