AQSh Iranmen soǵysta bir kúnde eki áskerı ushaǵynan aıyryldy
ASTANA. KAZINFORM – Juma kúni kúndiz Irannyń qarýly kúshteri amerıkalyq joıǵysh ushaqty atyp túsirgenin málimdedi, dep habarlaıdy DW.
Bastapqyda ırandyq tarap onyń F-35 joıǵyshy ekenin habarlaǵanymen, The Aviationist basylymy synyqtardy taldaý nátıjesinde bul ushaqtyń F-15E Strike Eagle joıǵysh-bombalaýshysy ekenin anyqtaǵanyn jazdy.
Basylym málimetinshe, ushaq ekıpajynyń eki múshesi de katapýlta arqyly shyǵyp úlgergen. Alaıda AQSh ázirge olardyń bireýin ǵana tapqan, ekinshisi iz-túzsiz joǵalǵandar qatarynda qalyp otyr.
Sonymen qatar ırandyq tarap ushqyshtyń qolǵa túskenin resmı túrde rastaǵan joq. Degenmen bılik ony ustaýǵa kómektesetinderge syıaqy jarııalaǵany aıtylyp jatyr.
Sol kúni keıinirek The New York Times amerıkalyq eki resmı tulǵaǵa silteme jasap, Ormýz buǵazy mańynda A-10 Warthog shabýyldaýshy ushaǵynyń qulaǵanyn habarlady. Ushaq pıloty aman qalyp, qutqarylǵan.
Osylaısha AQSh bir kún ishinde birden eki áskerı ushaǵynan aıyrylyp otyr. Sarapshylardyń pikirinshe, bul jaǵdaı aımaqtaǵy áskerı shıelenistiń kúrt kúsheıgenin kórsetedi.
Degenmen Iran Islam revolıýtsııasy saqshylar korpýsy (KSIR) ushqyshtardyń birin tutqynǵa alǵanyn málimdedi.
Al AQSh prezıdenti Donald Tramp atyp túsirilgen amerıkalyq ushaqtyń Iranmen kelissózderge áser etpeıtinin málimdedi.
– Joq, múlde áser etpeıdi... biz soǵys jaǵdaıyndamyz, – dedi Tramp.
Sońǵy málimetterge sáıkes, AQSh tarapy bir ushqyshty qutqarǵanyn rastady, al ekinshi ekıpaj múshesine qatysty qarama-qaıshy aqparat tarady. Onyń qolǵa túskeni aıtyla bastady. AQSh bul aqparatty resmı túrde áli tolyq rastaǵan joq.
Eske sala keteıik, jýyrda Qyrymda ushaq apatqa ushyrap, 29 adam mert boldy.
