AQSh Iranmen saýda jasaıtyn elderden keletin taýarlardan baj salyǵyn alady
ASTANA. KAZINFORM — AQSh prezıdenti Donald Tramp Irannan taýar nemese qyzmet satyp alatyn elderden ákelinetin ónimderge qosymsha kedendik baj salyǵyn engizý múmkindigin kózdeıtin atqarýshy jarlyqqa qol qoıdy. Bul týraly TASS agenttigi habarlady.
Qujatta AQSh aýmaǵyna ımporttalatyn jáne Irannan taýarlar men qyzmetterdi tikeleı nemese janama túrde satyp alatyn, ımporttaıtyn ne ózge jolmen alatyn memleketterde óndirilgen ónimderge qosymsha advalorlyq (taýar qunyna proportsıonaldy) baj salyǵy qoldanylýy múmkin ekeni naqtylanǵan. Máselen, onyń mólsheri 25 paıyzdy quraýy yqtımal.
Atalǵan sharalar 7 aqpannan bastap kúshine enedi.
Sondaı-aq jarlyqta Vashıngton ákimshiligi buǵan deıin engizilgen jáne Iranǵa qarsy basqa da ekonomıkalyq shekteýlerdiń quqyqtyq negizi retinde qoldanylyp kelgen tótenshe jaǵdaı rejımin uzartý qajet dep sanaıtyny atap ótilgen.
Qujatta Tegerannyń saıasaty «AQSh úshin áli de ádetten tys ári tótenshe qaýip tóndiredi» dep kórsetilgen.
Eske sala keteıik, Iran men AQSh Omanda kelissózderdiń kezekti raýndyn aıaqtady. Bul kezdesýler ótken jyly Izraıl men Iran arasyndaǵy 12 kúndik qaqtyǵys barysynda AQSh-tyń ırandyq ıadrolyq nysandarǵa jasaǵan soqqylarynan keıingi shıelenisten soń ótken alǵashqy tikeleı dıplomatııalyq baılanys boldy. Kelissóz áskerı shıelenistiń qaýpi men Vashıngton men Tegerannyń qatań málimdemesi aıasynda ótip jatyr.