AQSh Iranmen kelissóz júrgizýge daıyn ekenin málimdedi
ASTANA. KAZINFORM — Vashıngton Iranmen kelissóz júrgizýge áli de ashyq, alaıda Tegerannyń dıplomatııalyq jolmen retteýge shynaıy nıet tanytyp otyrǵanyna kúmánmen qaraıdy, dep habarlaıdy Kazinform agenttiginiń menshikti tilshisi.
AQSh memlekettik hatshysy Marko Rýbıo Manılada ótken Ońtústik-Shyǵys Azııa memleketteri qaýymdastyǵynyń (ASEAN) syrtqy ister mınıstrleriniń kezdesýinde sóılegen sózinde AQSh-tyń Iranmen syndarly dıalogqa áli de daıyn ekenin aıtty.
— Amerıka Qurama Shtattary árdaıym dıplomatııalyq joldy qoldaıdy. Qazirgi másele — olardyń kelissózderge baıyppen qaramaı otyrǵanynda. Eger olar shyndap kelissóz júrgizýge daıyn bolsa, biz de daıynbyz. Al eger olaı bolmasa, óz múddelerimiz ben odaqtastarymyzdyń múddelerin qorǵaý úshin qajetti barlyq sharany qabyldaımyz, — dedi ol.
Rýbıonyń aıtýynsha, Vashıngton taraptar óz moınyna alǵan mindettemelerdi saqtaǵan jaǵdaıda kelissóz júrgizýge ázir. Ol kelisimderdiń oryndalmaýy tıisti saldarǵa ákelýi tıis ekenin atap ótti.
Memlekettik hatshy sondaı-aq Irannyń Ormýz buǵazyndaǵy keme qatynasyn baqylaýyna qarsy ekenin bildirdi.
🇺🇸🇮🇷 Marco Rubio on talks with Iran:
— Mario Nawfal (@MarioNawfal) July 22, 2026
"The problem we're having right now is that they're not serious about talks. If they're serious, we're serious. If they're not, then we will do what is necessary to protect our interests and also the interests of our allies."
He's warning…
— Eger qandaı da bir memleket halyqaralyq sý jolyn baqylap, odan ótý úshin aqy alyp, tólemegen kemelerge shabýyl jasaýyna jol berilse, bul óte qaýipti pretsedentke aınalady. Mundaı jaǵdaı keıin álemniń basqa óńirlerinde de qaıtalanýy múmkin, — dedi Rýbıo.
Onyń aıtýynsha, AQSh-tyń Parsy shyǵanaǵyndaǵy odaqtastary Ormýz buǵazy arqyly ótkeni úshin qandaı da bir tólem engizýdi qoldamaıdy. Vashıngton óńir elderiniń qaýipsizdigine, turaqtylyǵy men ál-aýqatyna nuqsan keltirýi múmkin sheshimder qabyldamaıdy.
Rýbıo Iran qoldaıtyn qarýly toptar máselesi de yqtımal kelissózderdiń kún tártibinde bolýy tıis ekenin aıtty.
AQSh memlekettik hatshysynyń bul málimdemesi Iemendegi «Ansar Alla» qozǵalysy Saýd Arabııasynyń tankerlerine Qyzyl teńizde shabýyl jasaýy múmkin ekenin eskertkennen birneshe kún ótken soń jasaldy.
Buǵan deıin Iran AQSh-pen shıelenisti báseńdetýge qatysty deldaldardan usynystar alǵanyn málimdegen bolatyn.
Iran AQSh-tyń Bahreın men Kýveıttegi áskerı nysandary joıylǵanyn jarııalady.
Sondaı-aq Irannyń osy aıdaǵy áýe shabýyldarynan amerıkalyq qansha sarbaz jaraqat alǵany aıtyldy.
